നിറംമാറുന്ന കൊറോണ വൈറസുകളും സുരക്ഷാ മാര്‍ഗങ്ങളും

അതിവേഗതയിലുള്ള കൊറോണ വൈറസ് മനുഷ്യജീവിതം ഭീതിദമാക്കി മുന്നേറിക്കൊണ്ടിരിക്കുന്നു. ഇത് ആദ്യമായി അരങ്ങേറിയ ചൈനയിലെ വുഹാന്‍ നഗരം ഇന്ന് ഒരു തുറന്ന ജയില്‍ പോലെ വര്‍ത്തിക്കുന്നു. രോഗനിര്‍ണയ പരിശോധനകളും പ്രതിരോധ മാര്‍ഗങ്ങള്‍ വിപുലപ്പെടുത്തി അതിവേഗ ആശുപത്രികളും നിര്‍മിച്ച് മനുഷ്യര്‍ മുന്നേറുമ്പോഴും രോഗാണു തോല്‍ക്കാന്‍ മനസ്സില്ലാതെ മനുഷ്യരെ വിഴുങ്ങിക്കൊണ്ടിരിക്കുന്നു.

കോവിഡ് 19 എന്ന പുതിയ കൊറോണ വൈറസ്

1937-ല്‍ ആദ്യമായി കൊറോണ വൈറസിനെ (ടൈപ്പ് 1) ബ്രോങ്കൈറ്റിസ് രോഗമുള്ള കോഴികളില്‍നിന്ന് വേര്‍തിരിച്ചെടുത്തു. കോഴി ഫാമുകളെ അതിഗുരുതരമായി ബാധിച്ച രോഗമായിരുന്നു അത്. മഞ്ഞുകാലത്ത് മനുഷ്യരില്‍ ജലദോഷം പോലുള്ള ഗുരുതരമല്ലാത്ത രോഗമുണ്ടാക്കുന്ന രണ്ടിനം കൊറോണ വൈറസുക(Corona Virus 229E, Corona Virus OC43) ളാണ് 2002 നവംബറിന് മുമ്പുണ്ടായിരുന്നത്. ഈ വൈറസുകള്‍ പട്ടി, പൂച്ച, വാവല്‍, പന്നി, പക്ഷികള്‍, പാമ്പ് എന്നിവയിലും കാണപ്പെടുന്നു. 80 മുതല്‍ 220 നാനോമീറ്റര്‍ വരെ വലുപ്പമുള്ള മനുഷ്യരെ അതിഗുരുതരമായി ആക്രമിക്കുന്ന ഏഴ് ഇനം കൊറോണ വൈറസുകള്‍ ഇന്ന് നിലവിലുണ്ട്.

2002-ലെ സാര്‍സ് കൊറോണ വൈറസ്

ഒരുതരം കാട്ടുപൂച്ചയില്‍നിന്നാണ് മനുഷ്യരിലേക്ക് വൈറസ് പകര്‍ന്നത് എന്ന് കണ്ടുപിടിത്തങ്ങള്‍ സാക്ഷ്യപ്പെടുത്തുന്നു. ആധുനിക സജ്ജീകരണങ്ങളോടെ ഒരാഴ്ചക്കകം ഇവയെ ചൈനയിലെ Communicable Disease Control(CDC) അധികാരികള്‍ തിരിച്ചറിയുകയും ചെയ്തു. അങ്ങനെ ഇതിന് Corona Virus Type 4 എന്നു പേരിട്ടു. എങ്കിലും ഈ രോഗത്തെപ്പറ്റി പഠിക്കാന്‍ വന്ന് ഇതേ രോഗത്താല്‍ മരണപ്പെട്ട Dr. Carlo Urbani  യുടെ സ്മരണാര്‍ഥം രോഗാണുവിന് Urbani SARS Associated Corona Virus എന്ന് പേര് തിരുത്തി.
ഒരു സ്പീഷീസി(ഇനം)ല്‍നിന്ന് മറ്റൊരു Specise -ല്‍ ഉള്ള വൈറസുമായി പരസ്പരം ചേരുമ്പോള്‍ (Recombination  എന്ന പ്രക്രിയ നടക്കുമ്പോള്‍) അവയുടെ ജീനുകള്‍ പരസ്പരം കൈമാറുകയും മ്യൂട്ടേഷ(Mutation)നില്‍ കൂടി മൂന്നാമത് ഒരിനം പുതിയ വൈറസ് രൂപപ്പെടുകയും ചെയ്യുന്നു. ഇവിടെ പന്നിയിലുള്ള കൊറോണ വൈറസ് മനുഷ്യരിലുള്ള കൊറോണ വൈറസുമായി ഒന്നിക്കുമ്പോള്‍ ഉണ്ടാവുന്ന ഹൈബ്രിഡ് രോഗാണുവിന് പന്നിയിലും മനുഷ്യനിലും ഉണ്ടായിരുന്ന സ്വഭാവങ്ങളോടൊപ്പം പുതിയ രൗദ്രഭാവങ്ങള്‍ സൃഷ്ടിച്ച് സാര്‍സ് പോലെയുള്ള വളരെ ഗുരുതരമായ അവസ്ഥ രോഗിക്ക് ഉണ്ടാക്കുന്നു. ഇങ്ങനെ പുതിയ ഇനം വൈറസുകള്‍ സമൂഹത്തില്‍ ഉണ്ടാവുമ്പോള്‍ അവക്കെതിരെ പ്രവര്‍ത്തിക്കാനുള്ള വാക്‌സിനുകള്‍ നിര്‍മിക്കാനും നമുക്ക് കഴിയാതെ വരുന്നു. നിറംമാറിക്കൊണ്ടിരിക്കുന്ന ഇത്തരം വൈറസുകള്‍ മനുഷ്യവംശത്തിനു തന്നെ വലിയ ഭീഷണിയാവുന്നു.
ഒറ്റപ്പെടുത്തലും (Isolation) നിരീക്ഷണവും (Quarantine) സ്വീകരിച്ചിട്ടും വളരെ പെട്ടെന്നുതന്നെ പകര്‍ച്ചവ്യാധി അയര്‍ലന്റ്, ഹോങ്കോങ്, ചൈന അടക്കം ആഗോളതലത്തില്‍ വ്യാപിച്ചുകൊണ്ടിരിക്കുകയാണ്. അഞ്ച് മാസങ്ങള്‍ക്കകം രോഗം നിയന്ത്രണാധീനമാക്കിയെങ്കിലും മുപ്പത് രാജ്യങ്ങളിലെ ആയിരക്കണക്കിനാളുകള്‍ക്ക് രോഗം പിടിപെടുകയും മരിക്കുകയും ചെയ്തു. ഇന്ത്യയിലും രോഗം റിപ്പോര്‍ട്ട് ചെയ്യപ്പെട്ടിരിക്കുന്നു.
അന്താരാഷ്ട്ര സംയോജന പഠനത്തിലൂടെ, അഭൂതപൂര്‍വമായ ധാരാളം പരീക്ഷണ നിരീക്ഷണങ്ങളിലൂടെ, ഈ രോഗത്തിനു കാരണമായ കൊറോണ വൈറസ് രോഗികളുടെ ശ്വസനേന്ദ്രിയ സ്രവത്തില്‍നിന്ന് ഇലക്‌ട്രോണ്‍ മൈക്രോ സ്‌കോപ്പിന്റെ സഹായത്തോടെയും ടിഷ്യു കള്‍ച്ചറിലൂടെയും ആനിമല്‍ ഇതോക്കുലേഷന്‍ പരീക്ഷണങ്ങളിലൂടെയും തിരിച്ചറിയുകയും വളരെ പെട്ടെന്ന് രോഗനിര്‍ണയം സാധ്യമാക്കുന്ന മോളിക്യുലാര്‍ പരിശോധനകളും സീറോളജിക്കല്‍ പരിശോധനകളും വികസിപ്പിക്കുകയും ചെയ്തു. അപ്പോഴാണ് ഈ വൈറസ് നേരത്തേ ഉണ്ടായിരുന്ന മൂന്നുതരം കൊറോണാ വൈറസുകളെപ്പോലെ അല്ല എന്നും ഈ വൈറസ് സാര്‍സ് പകര്‍ച്ചവ്യാധിക്ക് പത്തു വര്‍ഷങ്ങള്‍ക്ക് ശേഷം (2014-ല്‍) ഒട്ടകങ്ങളില്‍നിന്ന് മനുഷ്യരിലേക്ക് പകര്‍ന്ന കൊറോണ വൈറസാണ് എന്ന് തിരിച്ചറിയുകയും ചെയ്തത്. 

പുതിയ കൊറോണ വൈറസ് (nCoV - 2019)

എന്നാല്‍ 2019-ന്റെ അവസാനദിനത്തില്‍ (nCoV - 2019) എന്ന് ലോകാരോഗ്യ സംഘടന പേരിട്ട ഇപ്പോള്‍ ആഗോളതലത്തില്‍ പടര്‍ന്നുകൊണ്ടിരിക്കുന്ന ഈ വൈറസ് മനുഷ്യരില്‍നിന്ന് മനുഷ്യരിലേക്ക് അതിവേഗം രോഗം പകര്‍ത്താന്‍ കഴിവുള്ളവയാണ്. ഒരു രോഗിയില്‍നിന്ന് 2 മുതല്‍ 4 വരെ ആള്‍ക്കാര്‍ക്ക് രോഗം പകര്‍ത്താനാവും. ഈ പുതിയ വൈറസ് ഉണ്ടാക്കുന്ന പകര്‍ച്ചവ്യാധി (സാര്‍സ്) ആഗോള പകര്‍ച്ചവ്യാധിയേക്കാള്‍ പത്തു മടങ്ങ് വലുതാണെന്ന് കണക്കാക്കപ്പെടുന്നു.

രോഗം പകരുന്ന രീതി

രോഗിയുടെ തുപ്പല്‍, കഫം, മൂക്കിലെ സ്രവങ്ങള്‍, ഉഛ്വാസവായു എന്നിവയിലൂടെ അന്തരീക്ഷത്തില്‍ പകരുന്ന രോഗാണുക്കള്‍ മറ്റുള്ളവരിലേക്ക് രോഗം പകര്‍ത്തുന്നു. രോഗിയുടെ മലത്തിലൂടെയും രോഗം പകരാം. രണ്ടാഴ്ചയില്‍ താഴെ ഇന്‍കുബേഷന്‍ സമയമുള്ള ഈ രോഗിയില്‍ പനി, ചുമ, കഫം, ശ്വാസം മുട്ട്, കിതപ്പ് എന്നീ ബുദ്ധിമുട്ടുകളോടെയാണ് രോഗം തുടങ്ങുന്നത്. ചിലപ്പോള്‍ രോഗിക്ക് വയറിളക്കവും ഉണ്ടാവാം. ശ്വാസതടസ്സം കൊണ്ടാണ് രോഗി മരിക്കുന്നത്. ഗുരുതരാവസ്ഥയില്‍ രോഗിക്ക് ന്യൂമോണിയ,  കിഡ്‌നി തകരാറ് എന്നിവ ഉണ്ടാവുകയും അതേ തുടര്‍ന്ന് മരണം സംഭവിക്കുകയും ചെയ്യാം.
രോഗിയുടെ രക്തം, കഫം, തൊണ്ടയില്‍നിന്നുള്ള സ്രവം എന്നിവ രോഗനിര്‍ണയ പരിശോധനകള്‍ക്ക് വിധേയമാക്കി വൈറസിന്റെ സാന്നിധ്യവും രോഗപ്രതിരോധ ശേഷിയും കണ്ടുപിടിക്കാവുന്നതാണ്. 

പ്രതിരോധ മാര്‍ഗങ്ങള്‍

- എപ്പോഴും ശുചിത്വം പാലിക്കുകയും കൈകള്‍ കഴുകുന്നത് ശീലമാക്കുകയും ചെയ്യുക.
- തുമ്മുമ്പോഴും ചുമക്കുമ്പോഴും വായും മൂക്കും മറയ്ക്കുകയും മാസ്‌കുകള്‍ ധരിക്കുകയും ചെയ്യുക.
- മാംസഭക്ഷണവും മുട്ടയും നന്നായി പാകം ചെയ്തുകഴിക്കുക.
- ചുമയും തുമ്മലുമുള്ള രോഗികളോട് അടുത്തിടപഴകരുത്.
- പൊതുസ്ഥലങ്ങളില്‍ തുപ്പരുത്.
- ആരുടെയും കണ്ണില്‍ തൊടരുത്.
- കൈകള്‍ സോപ്പും ഒഴുകുന്ന വെള്ളവും ഉപയോഗിച്ച് കഴുകുകയും 70 % Ethyle Alcohol  അടങ്ങിയ Disenfeetatn  കൊണ്ട് കൈ Ruinse ചെയ്യുകയും വേണം.
- പൊതുജനങ്ങള്‍ക്ക് രോഗത്തെപ്പറ്റിയുള്ള അറിവുകള്‍ പകര്‍ന്നുകൊടുക്കുക.

ഈ രോഗത്തിന് തക്കതായ ഔഷധങ്ങളോ ചികിത്സയോ വാക്‌സിനോ ഇല്ലാത്തതിനാല്‍ രോഗപ്രതിരോധ മാര്‍ഗങ്ങള്‍ സ്വീകരിക്കുന്നതാണ് ഉത്തമം.

ശുചിത്വം പാലിക്കുകയും ശക്തമായ മുന്‍കരുതലുകളും പ്രതിരോധ നടപടികളും സ്വീകരിക്കുന്നതും ഒരുപരിധിവരെ നമ്മെ രക്ഷിക്കും എന്ന് പ്രത്യാശിക്കാം. 

എഴുതിയത്: പ്രഫ. കെ. നസീമ

ഔഷധ ഗുണമുള്ള ചുകന്നുള്ളിയും ഇഞ്ചിയും

ഭക്ഷണത്തിന്റെ രുചിയും ഗന്ധവും വര്‍ധിപ്പിക്കുന്നതുകൊണ്ട് അടുക്കളയില്‍ ഒഴിച്ചുകൂടാനാവാത്ത പലവ്യഞ്ജനമാണ് ഉള്ളി. ബാക്ടീരിയ, ഫംഗസ് തുടങ്ങിയവയോട് പോരാടാനുള്ള ശക്തികൂടി ഉള്ളിക്കുണ്ട്. പ്രോട്ടീന്‍, വിറ്റാമിനുകള്‍, സള്‍ഫര്‍ തുടങ്ങിയ രാസഘടകങ്ങളാല്‍ സമ്പുഷ്ടമാണ് ചുവന്നുള്ളി. ആധുനിക ശാസ്ത്രപ്രകാരം രോഗാണുനാശനം, ഹൃദയ സംരക്ഷണം, പ്രമേഹ രോഗികളില്‍ പഞ്ചസാരയുടെ അളവു നിയന്ത്രണം, ആസ്ത്മ, കാന്‍സര്‍ തുടങ്ങിയ രോഗങ്ങളെ ചെറുക്കാനുള്ള ശേഷി എന്നിവ ചുവന്നുള്ളിക്കുണ്ട്. നാട്ടുവൈദ്യ സമ്പ്രദായങ്ങളിലും ഉള്ളിക്കുള്ള പങ്ക് വലുതാണ്. പനി, ചുമ, ശ്വാസം മുട്ടല്‍, വിശപ്പില്ലായ്മ, ദഹനക്കുറവ്, മൂത്രാശയ രോഗങ്ങള്‍, ആര്‍ത്തവ രോഗങ്ങള്‍, ചര്‍മരോഗങ്ങള്‍, വിഷബാധ എന്നിവയില്‍ ചുവന്നുള്ളി ഫലപ്രദമായി ഉപയോഗിക്കപ്പെടുന്നു. ആണ്‍-പെണ്‍ വ്യത്യാസമില്ലാതെ മനുഷ്യശരീരത്തിലെ ആന്തരികാവയവങ്ങളുടെ കേടുപാടുകള്‍ തീര്‍ത്ത് ശരീര പുനര്‍നിര്‍മാണത്തില്‍ ചുവന്നുള്ളി വലിയ പങ്കാണ് വഹിക്കുന്നത്. കോശങ്ങളെ പുനരുജ്ജീവിപ്പിച്ച് നിത്യയൗവനവും ആരോഗ്യവും നിലനിര്‍ത്തുന്നതിലും ആയുസ്സിന്റെ നെടുംതൂണുകളായ സപ്തധാതുക്കളെ പരിപാലിക്കുന്നതിലും ചുവന്നുള്ളിക്ക് അതിശയകരമായ ഔഷധവീര്യമുണ്ട്.

കേരളത്തെ യൂറോപ്യന്മാര്‍ക്കിടയില്‍ പ്രിയങ്കരമാക്കിയ ഭക്ഷ്യവിഭവമാണ് ഇഞ്ചി. നൂറ്റിയൊന്നു കറികള്‍ക്കു പകരമാണ് ഇഞ്ചിക്കറി എന്നു പറയാറുണ്ട്. ഇഞ്ചി ഉദരവായു നീക്കി ദഹനത്തെ ശക്തിപ്പെടുത്തുന്നു. വാതത്തെയും കഫത്തെയും ശമിപ്പിക്കും. ഛര്‍ദി, വയറുവേദന തുടങ്ങിയവക്ക് ഇഞ്ചി അല്‍പം ഉപ്പ് കൂട്ടിക്കഴിക്കുന്നത് ഉത്തമ ഔഷധമാണ്. അര ഔണ്‍സ് ഇഞ്ചിനീരില്‍ ഒരു ടീസ്പൂണ്‍ ഉലുവപ്പൊടി ചേര്‍ത്ത് വെറും വയറ്റില്‍ കഴിച്ചാല്‍ പ്രമേഹത്തിന് ഉന്മൂലനാശം സംഭവിക്കും. ഔഷധഗുണം ഏറെയുള്ള വ്യഞ്ജനമാണ് ഇഞ്ചി. ദഹനശേഷിയെ വര്‍ധിപ്പിക്കാനും ഭക്ഷണം കൂടുതല്‍ രുചികരമാക്കാനും ഇഞ്ചിക്ക് കഴിയും

നിങ്ങള്‍ പരാജിതനല്ല; വിജയിച്ചവനാണ്....

മുഴുവനായിട്ടും വായിക്കുക എന്നിട്ട്‌ സ്വയം ഒന്ന് ചിന്തിക്കുക

ഇരുനൂറു മുതല്‍ മുന്നൂറു ദശലക്ഷം വരെ

ബീജങ്ങളാണ്

ഒരു ലൈംഗികബന്ധത്തിന് ശേഷം

സ്ത്രീയില്‍ നിക്ഷേപിക്കപ്പെടുന്നത്......!

ആ ബീജങ്ങളെല്ലാം

അണ്ഡത്തെ ലക്ഷ്യമാക്കി നീന്തിത്തുടങ്ങും....!

ഇങ്ങനെ പുറപ്പെടുന്ന

മുന്നൂറു ദശലക്ഷം ബീജങ്ങളില്‍ കൂടി വന്നാല്‍

അഞ്ഞൂറ് എണ്ണം ബീജങ്ങള്‍ മാത്രമാണ്

ലക്ഷ്യത്തില്‍ എത്തിച്ചേരുന്നത്.....

ബാക്കിയൊക്കെ വഴിയില്‍ തളര്‍ന്നും ക്ഷീണിച്ചും
പരാജയപ്പെട്ടു പോകുന്നു......

അങ്ങനെ എത്തിപ്പെടുന്ന അഞ്ഞൂറ്

ബീജങ്ങളില്‍ വെറും ഒരു ബീജത്തിന് മാത്രമേ

അണ്ഡത്തിന്‍റെ തൊലി ഭേദിച്ച്

സങ്കലനം നടത്താന്‍ കഴിയുകയുള്ളൂ.....!

ആ വിജയി നിങ്ങളായിരുന്നു!!

ഇതെപ്പറ്റി നിങ്ങള്‍

എപ്പോഴെങ്കിലും ചിന്തിച്ചിട്ടുണ്ടോ?

നിങ്ങള്‍ ഒരു ഓട്ടപ്പന്തയം ജയിച്ചത്‌

കണ്ണുകള്‍ ഇല്ലാതെയാണ്..

നിങ്ങള്‍ പന്തയം ജയിച്ചത്‌

യാതൊരു സര്‍ട്ടിഫിക്കറ്റും നേടാതെയാണ്‌,

ഒരു വിരലടയാളവും ഇല്ലാതെയാണ്

നിങ്ങള്‍ ആ മത്സരത്തില്‍ പങ്കെടുത്തത്,...!

നിങ്ങള്‍ക്ക് യാതൊരു വിദ്യാഭ്യാസ യോഗ്യതയും

ഉണ്ടായിരുന്നില്ല...

എന്നിട്ടും നിങ്ങള്‍ ജയിച്ചു....

ആരും സഹായത്തിനുണ്ടായിരുന്നില്ല,

എന്നിട്ടും നിങ്ങള്‍ നേടി......!

പിന്നെ എന്തിനാണ് നിങ്ങള്‍ ഇപ്പോള്‍

പരാജയത്തെ ഭയപ്പെടുന്നത്....?

നിങ്ങള്‍ക്കിപ്പോള്‍ കണ്ണുകളുണ്ട്,

കൈകളുണ്ട്,

കാലുകളുണ്ട്,

വിദ്യാഭ്യാസവും

സര്‍ട്ടിഫിക്കറ്റുകളുമുണ്ട്.....!

സഹായത്തിനു ആളുകളുണ്ട്.

സ്വന്തമായി ഒരു പ്ലാന്‍ ഉണ്ട്.

സ്വപ്നവും വിഷനും ഉണ്ട്. ....!

ഇതൊന്നുമില്ലാതിരുന്നിട്ടും

അന്ന് നിങ്ങള്‍ പിന്തിരിഞ്ഞില്ല,

നിങ്ങള്‍ വിജയിക്കുകയും ചെയ്തു.

ഇന്ന് നിങ്ങള്‍ പിന്തിരിയുകയെന്നാല്‍

നിങ്ങളുടെ സൃഷ്ടാവിനോടുള്ള നിന്ദയാണ്.....!

ഇപ്പോള്‍ നിങ്ങള്‍ കാണുന്നത് എന്തോ ആവട്ടെ,

അന്ന്

അമ്മയുടെ ഗര്‍ഭപാത്രത്തിലെ വിജയി

നിങ്ങള്‍ ആയിരുന്നു, നിങ്ങള്‍ മാത്രം ...

എപ്പോഴാണോ തോറ്റുപോയവന് ഈ ഭൂമിയിൽ

അഭിപ്രായസ്വാതന്ത്ര്യം ഇല്ല എന്നു കരുതി അങ്ങനെ മനോഭാവവുമായി

നിശബ്ദരായി ഇരിക്കുന്നത്‌, അപ്പോഴാണ്

നിങ്ങൾ യഥാർത്ഥത്തിൽ തോൽക്കുന്നത് .

ഈ ഭൂമി ജയിച്ചവർക്ക് മാത്രമല്ല,ജയിക്കാൻ വേണ്ടി

പൊരുതുന്നവർക്ക് കൂടെ ഉള്ളതാണ്....

(കോപ്പി)

വേണം ഒരു കണ്ണ് കുട്ടികളില്‍

വീടുകൡലും വിദ്യാലയങ്ങളിലും പൊതു ഇടങ്ങളിലും കുട്ടികളുടെ സുരക്ഷ വെല്ലുവിളി നേരിടുകയാണെന്ന് കാണിക്കുന്ന സംഭവങ്ങള്‍ രാജ്യത്ത് വര്‍ധിക്കുകയാണ്. നാഷ്‌നല്‍ ക്രൈം റിക്കോര്‍ഡ്‌സ് ബ്യൂറോയുടെ കണക്കു പ്രകാരം 2006 മുതല്‍ 10 വര്‍ഷത്തിനിടയില്‍ കുട്ടികള്‍ക്ക് നേരെയുള്ള ലൈംഗിക അതിക്രമങ്ങളില്‍ 600 ശതമാനം വര്‍ധനവാണ് ഇന്ത്യയില്‍ ഉണ്ടായത്. ലൈംഗികാതിക്രമങ്ങള്‍ മാത്രമല്ല, കുട്ടികള്‍ക്കെതിരെ മറ്റ് വിധത്തിലുള്ള കുറ്റകൃത്യങ്ങളും രാജ്യത്ത് കൂടിവരികയാണ്. 2016-ല്‍ മാത്രം കുട്ടികള്‍ക്കെതിരെയുള്ള കുറ്റകൃത്യങ്ങള്‍ 1,06,958 ആണ്. കൊലപാതകം, ബലാത്സംഗം, തട്ടിക്കൊണ്ടുപോകല്‍, വേശ്യാവൃത്തിക്ക് നിര്‍ബന്ധിക്കല്‍, ശൈശവവിവാഹം തുടങ്ങിയവയാണ് കുട്ടികള്‍ക്കെതിരെയുള്ള പ്രധാന കുറ്റകൃത്യങ്ങള്‍.
സാക്ഷരതയിലും സാമൂഹിക അവബോധത്തിലും മുന്നിലുള്ള നമ്മുടെ സംസ്ഥാനത്തും കുട്ടികള്‍ക്കെതിരെയുള്ള ഇത്തരം കുറ്റകൃത്യങ്ങള്‍ വര്‍ധിക്കുന്നു. സ്റ്റേറ്റ് ക്രൈം റിക്കോര്‍ഡ്‌സ് ബ്യൂറോയുടെ കണക്ക് പ്രകാരം 2017-ല്‍ 3478 അതിക്രമങ്ങളാണ് കേരളത്തില്‍ കുട്ടികള്‍ക്കെതിരെ ഉണ്ടായതെങ്കില്‍, 2018-ല്‍ ഇത് 4008 ആയി വര്‍ധിച്ചു. 'പോക്‌സോ' നിയമപ്രകാരം, കുട്ടികളെ ലൈംഗികമായി പീഡിപ്പിച്ച കേസുകള്‍ 2017-ല്‍ 2697 -ഉം 2018-ല്‍ 2900-ഉം ആണ്. 2008 മുതല്‍ 2018 വരെയുള്ള 11 വര്‍ഷത്തിനുള്ളില്‍ 6910 പെണ്‍കുട്ടികളാണ് കേരളത്തില്‍ ബലാത്സംഗത്തിന് ഇരകളായത്. കുട്ടികള്‍ക്കെതിരെയുള്ള കുറ്റകൃത്യങ്ങളില്‍ കഴിഞ്ഞ 10 വര്‍ഷം കൊണ്ട് ഏഴിരട്ടിയിലധികം വര്‍ധനവാണ് സംസ്ഥാനത്ത് രേഖപ്പെടുത്തിയത്.
ലൈംഗിക ദുരുദ്ദേശ്യങ്ങള്‍ക്ക് വേണ്ടി മാത്രമല്ല, ബാലവേല, വേശ്യാവൃത്തി, ഭിക്ഷാടനം, അവയവവ്യാപാരം, ലഹരിവസ്തുക്കളുടെ വില്‍പന തുടങ്ങിയവക്ക് ഉപയോഗിക്കുന്നതിനും ഭിക്ഷാടന മാഫിയകളും ക്രിമിനല്‍ സംഘങ്ങളും കുട്ടികളെ തട്ടിക്കൊണ്ടുപോകുന്നുണ്ട്. 2008 മുതല്‍ 2018 വരെയുള്ള 11 വര്‍ഷക്കാലയളവില്‍ കുട്ടികളെ തട്ടിക്കൊണ്ടുപോകലും കാണാതാകലുമായി ബന്ധപ്പെട്ട് രജിസ്റ്റര്‍ ചെയ്ത കേസുകളുടെ എണ്ണം 1512 ആണ്. കഴിഞ്ഞ വര്‍ഷം കാണാതായ കുട്ടികളില്‍ 56 പേരെ ഇനിയും കണ്ടെത്താന്‍ കഴിഞ്ഞിട്ടുമില്ല.
മദ്യം, മയക്കുമരുന്ന് തുടങ്ങിയ ലഹരിപദാര്‍ഥങ്ങളുടെ വില്‍പനക്കും കള്ളക്കടത്തിനും കുട്ടികളെ ഉപയോഗിക്കുന്ന സംഘങ്ങളും ഇന്ന് സജീവമാണ്. 2017-ല്‍ ആദ്യത്തെ 9 മാസത്തിനിടയില്‍ കഞ്ചാവും ലഹരിഗുളികകളും കടത്തിയ കേസുകളില്‍ പാലക്കാട് ജില്ലയില്‍ മാത്രം പോലീസ് പിടിയിലായത് 63 വിദ്യാര്‍ഥികളാണ്. തമിഴ്‌നാട്ടില്‍നിന്ന് കേരളത്തിന്റെ വിവിധ ഭാഗങ്ങളിലേക്ക് ലഹരിവസ്തുക്കള്‍ കടത്തുന്നതിനിടയിലാണ് ഇവര്‍ പോലീസ് പിടിയിലായത്. ഇവരില്‍ പലരും വിവിധ കാരണങ്ങളാല്‍ പഠനം ഇടക്കു വെച്ച് നിര്‍ത്തിയവരും തകര്‍ന്ന കുടുംബങ്ങളില്‍നിന്നുള്ളവരുമാണ്.

ആണ്‍കുട്ടികള്‍ക്കും രക്ഷയില്ല
പെണ്‍കുട്ടികള്‍ മാത്രമല്ല ആണ്‍കുട്ടികളും സുരക്ഷിതരല്ല എന്നതാണ് വാസ്തവം. അതിക്രമങ്ങള്‍ക്കും പീഡനങ്ങള്‍ക്കും കൂടുതല്‍ വിധേയരാകുന്നത് ആണ്‍കുട്ടികളാണെന്ന് കേരളത്തിലെ സ്‌കൂള്‍ വിദ്യാര്‍ഥികള്‍ക്കിടയില്‍ നടത്തിയ പഠനം വെളിപ്പെടുത്തുന്നു. തൃശൂരില്‍ നടത്തിയ ഗവേഷണത്തിന്റെ 2017-ല്‍ എല്‍സെവീര്‍ ശാസ്ത്രമാസികയില്‍ പ്രസിദ്ധീകരിച്ച റിപ്പോര്‍ട്ട് പ്രകാരം, പെണ്‍കുട്ടികളില്‍ 6.2 ശതമാനം പേര്‍ ലൈംഗികമായി പീഡിപ്പിക്കപ്പെടുമ്പോള്‍, ലൈംഗിക അതിക്രമത്തിന് വിധേയരാകുന്ന ആണ്‍കുട്ടികള്‍ 29.5 ശതമാനം ആണ്. ശാരീരിക അതിക്രമങ്ങള്‍ അനുഭവിക്കുന്ന പെണ്‍കുട്ടികള്‍ 61.7 ശതമാനം ആണ്. എന്നാല്‍ ആണ്‍കുട്ടികളില്‍ ഇത് 83.4 ശതമാനം വരും. 75.7 ശതമാനം പെണ്‍കുട്ടികളും 89.5 ശതമാനം ആണ്‍കുട്ടികളും മാനസിക പീഡനങ്ങള്‍ക്ക് ഇരകളാകുന്നു. കുടുംബത്തിന്റെ സാമൂഹികവും സാമ്പത്തികവുമായ പിന്നാക്കാവസ്ഥയാണ് കുട്ടികള്‍ പീഡിപ്പിക്കപ്പെടുന്നതിന് പ്രധാന കാരണമായി പഠനം കണ്ടെത്തിയത്. സ്ഥിരമായി മദ്യവും മയക്കുമരുന്നും ഉപയോഗിക്കുന്നവര്‍ ഉള്ള കുടുംബങ്ങളിലെ കുട്ടികളാണ് അതിക്രമങ്ങള്‍ക്ക് കൂടുതലായി വിധേയരാകുന്നതെന്നും പഠനം കണ്ടെത്തുകയുണ്ടായി. 2017-18 കാലയളവില്‍ സംസ്ഥാനത്തെ ചൈല്‍ഡ് ലൈന്‍ യൂനിറ്റുകളില്‍ റിപ്പോര്‍ട്ട് ചെയ്ത ലൈംഗികാതിക്രമ കേസുകളില്‍ 1019 പെണ്‍കുട്ടികള്‍ പീഡിപ്പിക്കപ്പെട്ടപ്പോള്‍, 133 ആണ്‍കുട്ടികളും അതിക്രമത്തിനിരകളായിട്ടുണ്ട്.

വീട്ടിലും പീഡനം
കുട്ടികളുടെ സുരക്ഷ അപകടത്തിലാക്കുന്നവിധം കുറ്റകൃത്യങ്ങള്‍ വര്‍ധിക്കുന്നതിനു പിന്നില്‍ നിരവധി കാരണങ്ങളുണ്ട്. സമൂഹത്തില്‍ വ്യാപകമാകുന്ന മദ്യാസക്തിയും മയക്കുമരുന്നുപയോഗവും കുട്ടികള്‍ക്കെതിരെയുള്ള അതിക്രമങ്ങള്‍ വര്‍ധിപ്പിക്കുന്നതില്‍ പ്രധാന പങ്ക് വഹിക്കുന്നുണ്ട്. ബാലപീഡനക്കേസുകൡലെ കുറ്റവാളികള്‍ പലരും സ്ഥിരം മദ്യപാനികളോ മയക്കുമരുന്ന് ഉപയോഗിക്കുന്നവരോ ആണെന്ന് പഠനങ്ങള്‍ കണ്ടെത്തിയിട്ടുണ്ട്. ലഹരി വസ്തുക്കളുടെ ഉപഭോക്താക്കളും കച്ചവടക്കാരുമായി മാറുന്ന കുട്ടികള്‍ സഹപാഠികളെ ഈ വിപത്തിലേക്ക് നയിക്കുന്നുമുണ്ട്.
സ്വന്തം കുടുംബാംഗങ്ങള്‍ പോലും ഇളംപ്രായക്കാരോട് മോശമായി പെരുമാറുന്നു എന്നതാണ് കുട്ടികളുടെ സുരക്ഷ നേരിടുന്ന മറ്റൊരു പ്രധാന വെല്ലുവിളി. 2017 ഏപ്രില്‍ മുതല്‍ 2018 മാര്‍ച്ച് വരെ കേരളത്തിലെ ചൈല്‍ഡ് ലൈന്‍ യൂനിറ്റുകളില്‍ റിപ്പോര്‍ട്ട് ചെയ്ത 1302 ബാല ലൈംഗികാതിക്രമ കേസുകളില്‍ 93.5 ശതമാനത്തിലും പ്രതികള്‍ കുട്ടികളുടെ അടുത്ത ബന്ധുക്കളോ പരിചയക്കാരോ ആണ്. ഇതില്‍ പകുതിയോളം സംഭവങ്ങളും നടന്നത് സ്വന്തം വീടുകൡലാണ് (591). 156 കേസുകള്‍ വിദ്യാലയങ്ങളില്‍ നടന്നവയാണ്. അയല്‍വീടുകളില്‍ 131 കുട്ടികളും വാഹനങ്ങളില്‍ 66 കുട്ടികളും പീഡിപ്പിക്കപ്പെട്ടു. കടകളില്‍ വെച്ച് കുട്ടികള്‍ അതിക്രമത്തിനിരയായ സംഭവങ്ങള്‍ 63-ഉം പൊതുവഴിയില്‍ ഇത് 23-ഉം ആണ്. ഇങ്ങനെ വീടും വിദ്യാലയവും പൊതുഇടങ്ങളും കുട്ടികള്‍ക്ക് സുരക്ഷിതമല്ലാതാകുന്ന അവസ്ഥ സമൂഹത്തിന്റെ ധാര്‍മിക അധഃപതനം കൂടിയാണ് കാണിക്കുന്നത്.

ആഘാതം ഗുരുതരം
ശാരീരികവും മാനസികവും ലൈംഗികവുമായ പീഡനങ്ങള്‍ക്ക് വിധേയരായി അരക്ഷിതാവസ്ഥയില്‍ ജീവിക്കുന്ന കുട്ടികള്‍ അനുഭവിക്കേണ്ടി വരുന്ന പ്രശ്‌നങ്ങള്‍ നിരവധിയാണ്. കാനഡ മക്ഗില്‍ സര്‍വകലാശാല നടത്തിയ പഠനം കണ്ടെത്തിരിയിരിക്കുന്നത് പീഡനം കുട്ടികളുടെ തലച്ചോറിലെ 'സ്ട്രസ് ഫൈറ്റിംഗ് ജീനു'കളെ ബാധിക്കുമെന്നാണ്. അതുവഴി പീഡനത്തിനിരകളാകുന്ന കുട്ടികളില്‍ മാനസിക പിരിമുറുക്കം നേരിടാനുള്ള കഴിവ് കുറയുകയും ആത്മവിശ്വാസം തകരുകയും ചെയ്യുന്നു. ഇത്തരം കുട്ടികളില്‍ സാഹചര്യങ്ങളുടെ സമ്മര്‍ദം അതിജീവിക്കാനുള്ള കഴിവ് കുറയുകയും വിഷാദ രോഗം, ആത്മഹത്യാ പ്രവണത തുടങ്ങിയവ വളരുകയും ചെയ്യും. ബാല്യകാലത്ത് ഏതെങ്കിലും വധത്തിലുള്ള പീഡനങ്ങള്‍ക്ക് ഇരകളായവര്‍ പിന്നീട് മുതിരുമ്പോള്‍ മാനസിക സംഘര്‍ഷം കുറക്കുന്നതിന് മദ്യം, മയക്കുമരുന്ന് തുടങ്ങിയ ലഹരിപദാര്‍ഥങ്ങള്‍ ഉപയോഗിക്കുന്നവരായും വ്യക്തിത്വ വൈകല്യമുള്ളവരായും ബാലപീഡകരായും മാറാനുള്ള സാധ്യതയും കൂടുതലാണെന്ന് പഠനങ്ങള്‍ പറയുന്നു. പീഡനത്തിന് വിധേയരായ കുട്ടികള്‍ക്ക് ജീവിതത്തോടു തന്നെ വിരക്തി തോന്നുകയും പഠനത്തില്‍ താല്‍പര്യം കുറയുകയും ചെയ്യും.

നിയമവും ശിക്ഷയും
കുട്ടികളുടെ സുരക്ഷയെ അപകടത്തിലാക്കുന്ന കുറ്റകൃത്യങ്ങള്‍ ചെയ്യുന്നവര്‍ക്ക് കടുത്ത ശിക്ഷ നല്‍കുന്ന നിരവധി നിയമങ്ങള്‍ നമുക്കുണ്ട്. ബാലനീതിനിയമപ്രകാരം, 18 വയസ്സിനു താഴെ പ്രായമുള്ള കുട്ടികളെ ശാരീരികമായും മാനസികമായും ഉപദ്രവിക്കുന്നവര്‍ക്ക് 3 വര്‍ഷം വരെ തടവോ ഒരു ലക്ഷം രൂപ വരെ പിഴയോ രണ്ടും കൂടിയോ ശിക്ഷ ലഭിക്കും. കുട്ടികളെ ഭിക്ഷാടനത്തിന് ഉപയോഗിക്കുന്നത്, 5 വര്‍ഷം വരെ തടവും ഒരു ലക്ഷം രൂപ പിഴയും ലഭിക്കുന്ന കുറ്റകൃത്യമാണ്. കുട്ടികള്‍ക്ക് മദ്യവും മയക്കുമരുന്നും നല്‍കുന്നവര്‍ക്കും അവയുടെ വില്‍പനക്ക് കുട്ടികളെ ഉപയോഗിക്കുന്നവര്‍ക്കും 7 വര്‍ഷം വരെ കഠിനതടവും ഒരു ലക്ഷം രൂപ പിഴയും ലഭിക്കും. ബാലവേല ചെയ്യിക്കുന്നവര്‍ക്ക് 5 വര്‍ഷം വരെ കഠിനതടവും ഒരു ലക്ഷം രൂപ പിഴയുമാണ് ശിക്ഷ. കുട്ടികളെ തട്ടിക്കൊണ്ടുപോകുന്നത് ഇന്ത്യന്‍ ശിക്ഷാനിയമപ്രകാരം ജയില്‍ശിക്ഷ കിട്ടാവുന്ന കുറ്റകൃത്യമാണ്.
കുട്ടികളെ ലൈംഗികാതിക്രമങ്ങളില്‍നിന്ന് സംരക്ഷിക്കുന്ന നിയമം (പോക്‌സോ) പ്രകാരം, കുട്ടികള്‍ക്കെതിരെയുള്ള ലൈംഗിക അതിക്രമം ജീവപര്യന്തം വരെ ജയില്‍ ശിക്ഷ ലഭിക്കാവുന്ന കുറ്റകൃത്യമാണ്. 18 വയസ്സിനു താഴെ പ്രായമുള്ള കുട്ടികളെ ലൈംഗികമായി പീഡിപ്പിക്കുന്നവര്‍ക്ക് വധശിക്ഷ നല്‍കുന്നതിന് 'പോക്‌സോ' നിയമത്തില്‍ ഭേദഗതി വരുത്താന്‍ കേന്ദ്രമന്ത്രിസഭ തീരുമാനിച്ചിട്ടുണ്ട്. 

വേണം ജാഗ്രത
എന്നാല്‍ നിയമങ്ങള്‍ കൊണ്ട് മാത്രം കുട്ടികളുടെ സുരക്ഷ ഉറപ്പുവരുത്താനാവില്ല. ബാലപീഡനങ്ങള്‍ സമൂഹത്തില്‍ വര്‍ധിക്കുന്ന പശ്ചാത്തലത്തില്‍ അതീവ ജാഗ്രത കൂടി നമുക്ക് വേണ്ടതുണ്ട്. സിനിമയിലും സീരിയലിലും അഭിനയം, പഠനത്തോടൊപ്പം ജോലി തുടങ്ങി കുട്ടികള്‍ക്കുള്ള വ്യാജവാഗ്ദാനങ്ങളുമായി എത്തുന്നവരെ കരുതിയിരിക്കണം. കപട സൗഹൃദത്തിന്റെയും പ്രണയത്തിന്റെയും ചതിക്കുഴികളില്‍ അകപ്പെടാതെ പെണ്‍കുട്ടികള്‍ സ്വയം സൂക്ഷിക്കണം. കുട്ടികള്‍ ചീത്ത കൂട്ടുകെട്ടുകളില്‍പെടുന്നില്ലെന്ന് രക്ഷിതാക്കള്‍ ഉറപ്പുവരുത്തണം. വാട്‌സാപ്പ്, ഫേസ്ബുക്ക് തുടങ്ങിയ സാമൂഹിക മാധ്യമങ്ങളുടെയും ഇന്റര്‍നെറ്റിന്റെയും ദുരുപയോഗത്തിന്റെ അപകടങ്ങളെക്കുറിച്ച് കുട്ടികളെ ബോധവല്‍ക്കരിച്ച്, അവരെ സൈബര്‍ കെണികളില്‍നിന്ന് രക്ഷിക്കണം. വീട്ടില്‍ മാതാപിതാക്കളും മക്കളും തമ്മില്‍ മനസ്സു തുറന്ന് സംസാരിക്കണം. മക്കള്‍ക്ക് സ്‌കൂളില്‍ പോകാന്‍ താല്‍പര്യം കുറയുകയോ പഠനത്തില്‍ ശ്രദ്ധ കുറയുകയോ അവരുടെ കൈവശം കൂടുതലായി പണം കാണുകയോ ചെയ്താല്‍, സ്‌നേഹത്തോടെ ചോദിച്ച് യഥാര്‍ഥ കാരണം കണ്ടെത്താന്‍ ശ്രമിക്കണം. ആവശ്യമെങ്കില്‍ മനഃശാസ്ത്രജ്ഞരുടെ അഭിപ്രായം തേടി കൗണ്‍സലിംഗോ വൈദ്യപരിചരണമോ നല്‍കണം. അതിക്രമത്തിനിരയായ കുട്ടികളെ കുറ്റപ്പെടുത്താതെ അവര്‍ക്ക് വൈകാരിക പിന്തുണ നല്‍കണം.
കേരളത്തില്‍ കുട്ടികള്‍ക്കെതിരെ അതിക്രമങ്ങള്‍ വര്‍ധിച്ചുവരുന്ന സാഹചര്യത്തില്‍ കുട്ടികളുടെ സുരക്ഷ ഉറപ്പാക്കാന്‍ സംസ്ഥാന പോലീസ് മേധാവി സര്‍ക്കുലര്‍ ഇറക്കിയിട്ടുണ്ട്. അതുപ്രകാരം എല്ലാ സ്‌കൂളുകളിലും സുരക്ഷാ സമിതികള്‍ രൂപവല്‍ക്കരിക്കണം. പെട്ടെന്നുണ്ടാകുന്ന അതിക്രമ സാഹചര്യങ്ങളെ നേരിടാന്‍ കുട്ടികള്‍ക്ക് സ്വയം പ്രതിരോധ മുറകള്‍ പരിശീലിപ്പിക്കണം. അപകടകരമായ ഓണ്‍ലൈന്‍ ഗെയ്മുകളില്‍ പെട്ടുപോകാതിരിക്കാന്‍ മുന്‍കരുതല്‍ സ്വീകരിക്കണം. കുട്ടികളില്‍ അസ്വാഭാവികമായ പെരുമാറ്റം കണ്ടാല്‍ രക്ഷിതാക്കളും അധ്യാപകരും ചോദിച്ച് വസ്തുത മനസ്സിലാക്കണം. ഓരോ ക്ലാസ് ടീച്ചറും തന്റെ ക്ലാസിലെ വിദ്യാര്‍ഥികളുടെ വിശദവിവരങ്ങള്‍ ശേഖരിച്ച് സൂക്ഷിക്കണം. എന്തെങ്കിലും ആവശ്യം പറഞ്ഞ് സ്‌കൂളില്‍നിന്ന് പുറത്തു പോകുന്ന വിദ്യാര്‍ഥി നിശ്ചിത സമയത്തിനുള്ളില്‍ ക്ലാസില്‍ തിരികെയെത്തിയിട്ടുണ്ടെന്ന് ക്ലാസ് ടീച്ചര്‍ ഉറപ്പു വരുത്തണം. ഇത്തരം നിര്‍ദേശങ്ങള്‍ നടപ്പിലാക്കാന്‍ വിദ്യാലയ അധികൃതര്‍ ശ്രദ്ധിക്കേണ്ടതുണ്ട്.
കുട്ടികള്‍ക്കെതിരെ വര്‍ധിക്കുന്ന കുറ്റകൃത്യങ്ങള്‍ സാംസ്‌കാരിക അപചയത്തിന്റെയും മൂല്യച്യുതിയുടെയും ലക്ഷണമാണ്. അതുകൊണ്ടാണ് കുട്ടികള്‍ക്കെതിരെയുള്ള കുറ്റകൃത്യങ്ങള്‍ മനുഷ്യത്വത്തിന് നേരെയുള്ള കടന്നാക്രമണമാണെന്ന് രാഷ്ട്രപതി തന്നെ അഭിപ്രായപ്പെട്ടത്. രാഷ്ട്രത്തിന്റെ ഭാവി സമ്പത്തായ കുട്ടികള്‍ പീഡനങ്ങള്‍ക്കും കുറ്റകൃത്യങ്ങള്‍ക്കും വിധേയമാകാതെ വളരാനുള്ള സുരക്ഷ ഒരുക്കേണ്ടത് സര്‍ക്കാര്‍ സംവിധാനത്തിന്റെ മാത്രമല്ല, പൊതുസമൂഹത്തിന്റെ കൂടി ഉത്തരവാദിത്തമാണ്. 

(വായിച്ചത് പകര്‍ത്തി എഴുതിയത് )

എഴുതിയത് : അശ്‌റഫ് കാവില്‍

ആത്മവിശ്വാസം

തന്റെ ബിസിനസ് എല്ലാം തകർന്നു കടം കയറി, ഇനി രക്ഷപ്പെടാൻ മാർഗ്ഗങ്ങൾ ഒന്നുമില്ല ഇനി ആത്മഹത്യാ മാത്രമാണ് പോംവഴി എന്ന് കരുതി പാർക്കിലെ ബെഞ്ചിൽ വിഷമിച്ചിരിക്കുകയായിരുന്നു ആ ബിസിനസുകാരൻ ..

ഒരാൾ തൊട്ടടുത്തുവന്നിരുന്നു ചോദിച്ചു, എന്താണ് നിങ്ങളുടെ പ്രശ്നം? 
അയാൾ എല്ലാം പറഞ്ഞു.
" ഞാൻ നിങ്ങളെ സഹായിക്കാം, കുറച്ചു പണം കടം തരാം, കൃത്യം ഒരു കൊല്ലം കഴിയുമ്പോൾ ഇതേ സ്ഥലത്തു വെച്ച് ഈ തുക മുഴുവനായി തിരിച്ചു തരണം" എന്നും പറഞ്ഞു അയാൾ ഒരു ചെക്ക് കൊടുത്തു നടന്നു പോയി..

ചെക് കണ്ടതും ബിസിനസ്കാരൻ ഞെട്ടിപ്പോയി, പത്തു മില്യൺ ഡോളറിന്റെ ചെക് അതും ലോകത്തിലെ ഏറ്റവും വലിയ ധനികനായ റോക് ഫെല്ലറുടെത്‌..

അയാൾ ആ ചെക്കുമായി വീട്ടിലേക്കു നടക്കുമ്പോൾ ചിന്തിച്ചു, എന്റെ കടം വീടാൻ ഇതിന്റെ ചെറിയൊരു അംശം മതി, ഈ ചെക്ക് ഇപ്പോൾ മാറേണ്ട. അയാൾ അത് ഭദ്രമായി പേഴ്സിൽ വെച്ചു..

നേരെ പോയത് താൻ കാശ് കൊടുക്കാനുള്ള ആളുകളുടെ അടുത്തേക്കായിരുന്നു..
അയാൾ അവരോടു സംസാരിച്ചു, തന്റെ കമ്പനി വീണ്ടും തുറന്നു പ്രവർത്തിക്കുക ആണെന്നും കാശ് തിരുച്ചു തരാൻ ആറുമാസത്തെ സമയം കൂടി ആവശ്യപ്പെട്ടു.. ബാങ്കിൽ പോയി മുടങ്ങിയ ലോൺ തിരിച്ചടക്കാൻ ആറുമാസത്തെ തവണകൾ ആവശ്യപ്പെട്ടു..

ബിസിനസ് നടന്നില്ലെങ്കിലും ആറുമാസം കഴിഞ്ഞാലും കൊടുക്കാൻ തന്റെ കയ്യിൽ ക്യാഷ് ചെക് ആയി തന്റെ പേഴ്സിൽ ഉണ്ടെന്ന ആത്മവിശ്വാസം അയാളുടെ മുന്നിൽ പുതിയ കുറെ ആശയങ്ങളും ചിന്തകളും ഉണ്ടാക്കി..

പിന്നീട് അയാൾ തന്റെ ഉൽപ്പന്നങ്ങൾ വാങ്ങുന്ന വ്യാപാരികളെ പോയി കണ്ടു, പണം അഡ്വാൻസ് ആയി തന്നാൽ ഉൽപ്പന്നങ്ങൾക്ക് നല്ല ഡിസ്‌കൗണ്ട് ഓഫർ ചെയ്തു കുറച്ചു പണം സ്വരൂപിച്ചു. ഫാക്ടറി വീണ്ടും തുടങ്ങി.. അയാൾ ഉത്സാഹത്തോടെ പണിയെടുത്തു. ആറുമാസം കൊണ്ടു അയാൾ പഴയ സ്ഥിതിയിൽ എത്തി. കടങ്ങൾ എല്ലാം വീടി..

അങ്ങനെ ഒരു കൊല്ലത്തിനു ശേഷം ആ തീയതി വന്നെത്തി.
അയാൾ ആ ചെക്കുമായി പാർക്കിലെ ബെഞ്ചിൽ പോയിരുന്നു, കുറച്ചു കഴിഞ്ഞപ്പോൾ റോക് ഫെല്ലർ വരുന്നു പുറകെ രണ്ടു സെക്യൂരിറ്റി ഉദ്യോഗസ്ഥരും ഉണ്ട് , അയാളുടെ അടുത്ത് വന്നിരുന്നപ്പോഴേക്കും
സെക്യൂരിറ്റി ഉദ്യോഗസ്ഥർ ഫെല്ലറെ പിടിച്ചു എഴുന്നേൽപ്പിച്ചു ..
ബിസിനസ് കാരൻ ചോദിച്ചു, നിങ്ങൾ എന്താണ് ചെയ്യുന്നത്, ഇദ്ദേഹം ആരാണെന്നു അറിയാമോ?
സെക്യൂരിറ്റി പറഞ്ഞു, ക്ഷമിക്കണം സാർ, ഇയാൾ താങ്കൾക്ക് എന്തെങ്കിലും ബുദ്ധിമുട്ട് ഉണ്ടാക്കിയോ?
ഇയാൾ ഞങളുടെ ചികിത്സയിൽ ഉള്ള ഒരു മാനസിക രോഗിയാണ്, ലോകത്തിലെ വലിയ ധനികനായ റോക് ഫെല്ലർ ആണെന്നും പറഞ്ഞു കാണുന്നവർക്കെല്ലാം വ്യാജ ചെക്കുകൾ ഒപ്പിട്ടു നൽകും..

സെക്യൂരിറ്റികൾ അയാളേം കൊണ്ടു പോയി..

ഇതും നോക്കി ബിസിനസ്കാരൻ സ്ഥബ്ധനായി നിന്നു..

ആ ചെക്ക് അയാളിൽ ഉണ്ടാക്കിയ ആത്മവിശ്വാസം വലുതായിരുന്നു.

നമ്മുടെ ആത്മ വിശ്വാസം ആണ് നമ്മുടെ മുന്നിൽ അടഞ്ഞ പല വഴികളും തുറന്നു കാണിക്കുന്നത്. നമ്മുടെ കൂടെയുള്ള റിസോർഴ്സുകൾ മാത്രം ഉപയോഗിച്ചാൽ തന്നെ നമുക്ക് വിജയിക്കാൻ കഴിയും..

ഞാന്‍ വായിച്ചതു പകര്‍ത്തിയത്.. (എനിക്കും ഒരുപാട്  ആത്മ വിശ്വാസം നല്‍കിയ ഒന്ന് തന്നെയാണ് ഇത് )

ഭക്ഷണം തന്നെയാണ് മരുന്ന്

രോഗമില്ലാത്ത അവസ്ഥയാണ് ആരോഗ്യം. ആഹാരത്തില്‍നിന്ന് കിട്ടുന്ന ഊര്‍ജമാണ് ശരീരത്തില്‍ ജീവന്റെ ചൈതന്യം നിലനിര്‍ത്തുന്നത്. അതിനാലാണ് നമുക്ക് ജനനം മുതല്‍ മരണം വരെ ആഹാരം കഴിക്കേണ്ടിവരുന്നത്. 
ഭക്ഷണം ശരീരത്തിന് ആരോഗ്യവും ശക്തിയും നല്‍കുന്നു. അതുകൊണ്ടുതന്നെ എന്തു കഴിക്കണം, എപ്പോള്‍ കഴിക്കണം, എങ്ങനെ കഴിക്കണം എന്നത് പ്രധാനമാണ്. മെച്ചപ്പെട്ട ആരോഗ്യം ഉണ്ടാവണമെങ്കില്‍ സമീകൃത ആഹാരം ശരീരത്തിന് ലഭിക്കേണ്ടതുണ്ട്.

എന്തിന് കഴിക്കുന്നു?
കാര്‍ബോ ഹൈഡ്രേറ്റ്‌സ്, പ്രോട്ടീന്‍സ്, ഫാറ്റ്‌സ്, മിനറല്‍സ്, വൈറ്റമിന്‍സ്, വെള്ളം എന്നിവയെല്ലാം ശരിയായ അളവുകളില്‍ അടങ്ങിയതും അതു കഴിച്ചുകഴിഞ്ഞാല്‍ ദഹിക്കുകയും ശരീരാവശ്യങ്ങള്‍ക്കുള്ള ഊര്‍ജം ഉല്‍പാദിപ്പിക്കുകയും അത് ശരീര വളര്‍ച്ചയെ ഉദ്ദീപിപ്പിക്കുകയും അതോടൊപ്പം ജീവന്‍ നിലനിര്‍ത്തുന്നതിനാവശ്യമായതുമായിരിക്കണം ആഹാരം.

സമീകൃതാഹാരം
ആരോഗ്യമുള്ള ഒരാള്‍ക്ക് ദിവസവും ആവശ്യമുള്ള ഊര്‍ജം കൃത്യമായി നല്‍കുന്ന ആഹാരത്തെ സമീകൃതാഹാരം (ആമഹമിരലറ ഉശല)േ എന്നു പറയുന്നു. ഒരു ദിവസത്തേക്ക് ഊര്‍ജം കുറഞ്ഞത് 2000 കലോറിയും കൂടിയത് 4000 കലോറിയും ആണ്. അതില്‍ 6 ഭാഗം കാര്‍ബോ ഹൈഡ്രേറ്റ്‌സ് (600 ഴാ), 2 ഭാഗം പ്രോട്ടീന്‍സ് (130 ഴാ), 1 ഭാഗം ഫാറ്റ് (65 ഴാ) എന്നിവ 
നിത്യേന ഭക്ഷണത്തില്‍ വേണം. ഇത്രയും കഴിച്ചാല്‍ നമുക്ക് 2970 (3000) കലോറി കിട്ടും.

എത്ര കഴിക്കണം?
ആഹാരത്തിന്റെ അളവ് കൂട്ടാതെ സമീകൃതമാക്കുകയാണ് വേണ്ടത്. കാരണം സമീകൃതാഹാരത്തില്‍ ധാന്യങ്ങള്‍, പച്ചക്കറികള്‍, പഴങ്ങള്‍, നട്ട്‌സ്, പരിപ്പു വര്‍ഗങ്ങള്‍, മത്സ്യം, മാംസം, പാല്‍ ഉല്‍പ്പന്നങ്ങള്‍ എന്നിവ അടങ്ങിയിരിക്കുന്നു.

എന്താണീ ഊര്‍ജം

ശരീരപ്രര്‍ത്തനങ്ങള്‍ക്ക് ഊര്‍ജം വേണം. സദാ മിടിച്ചുകൊണ്ടിരിക്കുന്ന ഹൃദയത്തിനും ശ്വാസകോശത്തിനും മറ്റു ശാരീരിക പ്രവര്‍ത്തനങ്ങള്‍ക്കും ഊര്‍ജം കൂടിയേ തീരൂ!
ഒരു ഗ്രാം വെള്ളത്തിന്റെ താപനില 1 ഡിഗ്രി സെന്റിഗ്രേഡ് ഉയര്‍ത്താന്‍ വേണ്ട ഊര്‍ജത്തിന്റെ അളവാണ് 1 കലോറി.
ജോഗിംഗ്, വള്ളം തുഴയല്‍ എന്നിവക്ക് ധാരാളം ഊര്‍ജം വേണം. 2 ഉഴുന്നുവട കഴിച്ചാല്‍ നമുക്ക് കിട്ടുന്ന 150 കലോറി ഊര്‍ജം സംഭരിക്കാതെ കളയാന്‍ നാം 30 മിനിറ്റ് നടക്കണം.

അല്‍പം ചരിത്രം

ആഹാരം വിശപ്പുമാറ്റാന്‍ മാത്രമല്ല, ആസ്വദിക്കാന്‍ കൂടിയുള്ളതാണ് എന്ന നിഗമനത്തില്‍നിന്നാണ് ഇന്നത്തെ പലതരം രുചിക്കൂട്ടുകള്‍ ഉണ്ടായത്.
നമ്മുടെ നാട്ടിലെ സസ്യാഹാരങ്ങളെല്ലാം തന്നെ ആയുര്‍വേദ വിധിപ്രകാരം ഔഷധങ്ങളാണ്. മാംസഭുക്കുകളിലാണ് ആഹാരം മൂലമുള്ള ആരോഗ്യപ്രശ്‌നങ്ങള്‍ കൂടുതലായി കണ്ടുവരുന്നത്.

കാരണം

തെറ്റായ ഭക്ഷണശൈലി നമുക്ക് അസ്വാസ്ഥ്യം വരുത്തുന്നു. അതിനാല്‍ നാം ജീവിക്കാന്‍ വേണ്ടി ഭക്ഷണം കഴിക്കുക. അല്ലാതെ ഭക്ഷിക്കാന്‍ വേണ്ടി ജീവിക്കരുത്. ഇന്ന് ലോകജനതയുടെ 60 ശതമാനത്തിലേറെപ്പേരും ആവശ്യത്തിലധികം ഭക്ഷണം കഴിക്കുന്നവരാണ്. എന്നാല്‍ ലോകത്ത് ഇന്ന് വലിയൊരു വിഭാഗം മുഴുപ്പട്ടിണിയിലുമാണ്. ഏഷ്യ, ആഫ്രിക്ക, തെക്കേ അമേരിക്ക എന്നിവിടങ്ങളില്‍ 70 ശതമാനം ആള്‍ക്കാരും പട്ടിണിയിലാണ്. ഇതില്‍ ഏറെപ്പേരും പട്ടിണിമൂലം മരണപ്പെടുന്നു.
എന്നാല്‍ ദരിദ്ര രാജ്യങ്ങളില്‍ പട്ടിണികിടന്നു മരിക്കുന്നവരേക്കാള്‍ അധികമാണ് സമ്പന്നരാജ്യങ്ങളില്‍ അമിതഭക്ഷണം കഴിച്ച് രോഗികളായി മരിക്കുന്നവര്‍.
അതേസമയം ആഹാരം കഴിക്കാതിരുന്നാല്‍ ശരീരത്തില്‍ ഊര്‍ജമില്ലാതെ തളര്‍ന്നുപോകും.
ശരീരാവശ്യങ്ങള്‍ക്കുള്ള എന്‍സൈം, ഹോര്‍മോണ്‍സ് എന്നിവ ഉണ്ടാക്കാനാവശ്യമുള്ള പ്രോട്ടീനുകള്‍, കലകള്‍ക്ക് ഉണ്ടാവുന്ന തേയ്മാനങ്ങളും അറ്റകുറ്റങ്ങളും ശരിയാക്കാനുള്ള അവശ്യവസ്തുക്കള്‍ എന്നിവയെ സൃഷ്ടിക്കാനും ആഹാരം കഴിക്കേണ്ടതുണ്ട്.
അന്നജം, മാംസ്യങ്ങള്‍, കൊഴുപ്പുകള്‍, ലവണങ്ങള്‍, വിറ്റാമിന്‍ തുടങ്ങിയ ഘടകങ്ങള്‍ ശരീരത്തിന് അത്യാവശ്യമാണ്.
പശയുള്ള മണ്ണുകൊണ്ടാണ് ദൈവം മനുഷ്യനെ സൃഷ്ടിച്ചത്. അതുകൊണ്ടുതന്നെ അവന്റെ ശരീരത്തിന് മണ്ണിലുള്ള എല്ലാ ലവണങ്ങളും അത്യാവശ്യമാണ്. ഇവയുടെ അഭാവം മനുഷ്യന് പല അസുഖങ്ങളും ഉണ്ടാക്കുന്നു (osteoporosis, anemia,  മുടികൊഴിച്ചില്‍ etc..)

ആഹാരവും വിശപ്പും

വിശപ്പ് തോന്നിയാല്‍ മാത്രമേ ആഹാരം കഴിക്കാവൂ. സുഖം, ദുഃഖം, പേടി, ഉത്കണ്ഠ എന്നിവയുള്ളപ്പോള്‍ മനസ്സ് അസ്വസ്ഥമായിരിക്കും. അപ്പോള്‍ വിശപ്പ് തോന്നുകയുമില്ല, ദാഹിക്കുകയുമില്ല.
ആഹാരം ആവശ്യമാണ് എന്ന ശരീരത്തിന്റെ അഭ്യര്‍ഥനയാണ് വിശപ്പ്. വിശപ്പിനെ നമ്മുടെ ശരീരത്തിനകത്തുള്ള ജൈവ ഘടികാരമാണെന്നും ഇവ നമ്മുടെ തലച്ചോറിലെ ചില കേന്ദ്രങ്ങളിലാണെന്നും ഈ ഘടികാരത്തെ നിയന്ത്രിക്കുന്ന ചില തന്മാത്രകളാണ് പതിവ് സമയങ്ങളില്‍ നമുക്ക് വിശപ്പ് തോന്നിപ്പിക്കുന്നതെന്നും ഈയിടെ കണ്ടുപിടിച്ചു. 2017-ലെ നോബെല്‍ പ്രൈസ് ഈ കണ്ടുപിടിത്തത്തിന് 3 അമേരിക്കന്‍ ശാസ്ത്രജ്ഞന്മാര്‍ക്കുണ്ട്. ആമാശയത്തില്‍ ഭക്ഷണമൊന്നുമില്ലാതെ, മുഴുവനായി ഒഴിഞ്ഞ സമയത്താണ് വിശപ്പിന്റെ വേദന ഉണ്ടാവുന്നത്. ഇതിനോടനുബന്ധിച്ച് ഭക്ഷണം കഴിക്കാനുള്ള ആഗ്രഹവും വരുന്നു.

എത്ര ആഹാരം കഴിക്കണം?
കലോറി കുറഞ്ഞതും കാര്‍ബോ ഹൈഡ്രേറ്റ് അടങ്ങിയതുമായ ഭക്ഷണമാണെങ്കില്‍ വയര്‍ നല്ലവണ്ണം നിറഞ്ഞാലേ കഴിക്കാനുള്ള ആഗ്രഹം കുറയൂ. എന്നാല്‍ ധാരാളം കൊഴുപ്പുള്ളതും ദഹിക്കാന്‍ ബുദ്ധിമുട്ടുള്ളതുമായ ഭക്ഷണങ്ങള്‍ കുറച്ചു കഴിച്ചാല്‍ വിശപ്പു മാറും.
പാനീയം കുടിക്കുമ്പോള്‍ പാലിക്കേണ്ട മര്യാദകള്‍
പാത്രത്തില്‍ തലയിട്ട് കുടിക്കുകയോ ഉഛ്വസിക്കുകയോ അരുത്. കുടിക്കുന്നതിനിടയില്‍ 3 പ്രാവശ്യം ശ്വാസം വിടണം. നിന്നോ ധൃതിയിലോ  വലിയ ചൂടിലോ പാനീയം കുടിക്കരുത്.

ആഹാരം കഴിക്കുമ്പോള്‍ ശ്രദ്ധിക്കേണ്ട ചില കാര്യങ്ങള്‍

ശുദ്ധജലം കുടിക്കുക
ബഹളം വെക്കാതെ, ധൃതികൂടാതെ, മൗനമായി, സംസാരിക്കാതെ, സന്തോഷത്തോടെ ആഹരിക്കുക.
നല്ല ഭക്ഷണം മിതമായി കഴിക്കുക (1/3 വയര്‍)
പഴയ ആഹാരം വര്‍ജിക്കുക.
വൃത്തിയുള്ളതും ഫ്രഷ് ആയതുമായ ആഹാരം കഴിക്കുക
ഉപ്പിലിട്ടത് അധികം പാടില്ല; ചമ്മന്തി നന്ന്.

ആരോഗ്യം നിലനിര്‍ത്താനുള്ള പരിഹാര മാര്‍ഗങ്ങള്‍

ദിവസവും ഒരു മണിക്കൂര്‍ നടക്കുക (ആഴ്ചയില്‍ 5 ദിവസം)
ഭക്ഷണത്തിനിടിയല്‍ അധികം വെള്ളം കുടിക്കരുത്. അതുപോലെ ഭക്ഷണശേഷം ഉടനെ വെള്ളം കുടിക്കരുത്.
നാരുകളും ജലാംശം കൂടുതലുള്ളതുമായ സമീകൃത ഭക്ഷണം ശീലിക്കണം. അമിതമായി ഉപ്പ്, പുളി, എരി, മസാല, ചൂട് എന്നിവ ആഹാരത്തില്‍ ഒഴിവാക്കണം.
ഭക്ഷണത്തില്‍ ഒന്നാംസ്ഥാനം പച്ചക്കറികള്‍ക്കും രണ്ടാം സ്ഥാനം പഴങ്ങള്‍ക്കും മൂന്നാം സ്ഥാനം തവിടുകളയാത്ത ധാന്യാഹാരത്തിനും നാലാം സ്ഥാനം മുളപ്പിച്ച പയര്‍ വര്‍ഗങ്ങള്‍ക്കും കൊടുക്കണം.
അതുപോലെ 80 ശതമാനം ക്ഷാരഗുണവും 20 ശതമാനം അമ്ലഗുണവും ഉള്ള ഭക്ഷ്യവസ്തുക്കള്‍ ആഹാരമായി തെരഞ്ഞെടുക്കണം.

കടപ്പാട്: പ്രഫ. കെ. നസീമ

അതിജീവിക്കും ഒറ്റക്കെട്ടായ്

മൂന്നു വർഷം മുന്നേ ഭീകര പ്രളയം മൂന്നിൽ കണ്ട ഒരു ചെന്നൈക്കാരന്റെ വാക്കുകൾ:

'മഴ തുടങ്ങിയപ്പോൾ നിങ്ങളും സന്തോഷിച്ചിട്ടുണ്ടാവും, .ഞങ്ങളെ പോലെ തന്നെ. കുട്ടികളും യുവാക്കളും മുതിർന്നവരും ആ മഴയിൽ തുള്ളിച്ചാടിയിട്ടുണ്ടാവാം.. വെള്ളത്തിന്റെ അളവ് കൂടുന്നതു നിങ്ങൾ ശ്രദ്ധിച്ചിട്ടുണ്ടാവില്ല, അതു പരിധി വിടുന്നത് വരെ. ഞങ്ങളെ പോലെ തന്നെ.

അതിനു ശേഷമാണ് നിങ്ങളും ഞങ്ങളും തമ്മിലുള്ള വ്യത്യാസം..

ഒരാഴ്ച തുടർച്ചയായി ചെന്നൈ നഗരത്തെ മഴ വിഴുങ്ങിയപ്പോൾ ഞങ്ങൾ മരവിച്ചു പോയി. സഹായത്തിനായി അലമുറയിട്ടു. നെഞ്ചത്തടിച്ചു. അന്ന് കേരളമക്കളും ആ ദുരിതത്തിൽനിന്നു കരപറ്റാൻ ഞങ്ങളുടെ നേരെ കൈ നീട്ടി തന്നു.

എന്നാൽ നിങ്ങൾ മലയാളികളോ...

മൂന്നുമാസമായി തുടരുന്ന മഴ!

തുടർന്നു വരുന്ന ദുരന്തം നിങ്ങൾ മുൻകൂട്ടികണ്ടു. പരസ്പരം ട്രോളിയും തമാശിച്ചും സമയം കളഞ്ഞിരുന്ന ഫേസ്‌ബുക്കും വാട്സാപ്പും പൊടുന്നനെ നിങ്ങൾ നിങ്ങളുടെ തന്നെ കൺട്രോൾ റൂമുകളാക്കി. ഇൻഫർമേഷൻ സെന്ററുകൾ ആക്കി. അവിടെയിരുന്നു നിങ്ങൾ കേമ്പുകൾ ഒരുക്കി.

നിങ്ങൾ ആർക്കു വേണ്ടിയും കാത്തുനിന്നില്ല. അയൽകാരോ കേന്ദ്രമോ വരുന്നത് വരെ അടങ്ങിയിരുന്നില്ല. നിങ്ങൾ പ്രവർത്തിക്കുകയായിരുന്നു. കൂടെയുള്ളവരെ രക്ഷപെടുത്താൻ, സഹായിക്കാൻ,

അതിനു വേണ്ടി നിങ്ങളുടെ സഹോദരങ്ങൾ ഗൾഫ് നാടുകളിൽ പോലും ഉറക്കമിളച്ചിരുന്നു നാട്ടിലെ രക്ഷാപ്രവർത്തഞങ്ങൾക്കു നിർദേശങ്ങൾ നൽകിക്കൊണ്ടിരിക്കുന്നു.

നിങ്ങൾ നിങ്ങൾക്കിടയിൽ തന്നെ പരിഹാരങ്ങൾ തേടുകയായിരുന്നു.

നിങ്ങൾക്ക് എങ്ങനെ ഇത് സാധിക്കുന്നു?

എന്തു ദുരന്തം വന്നാലും ഇത്ര സംഘടിതമായി പ്രതിരോധിക്കാൻ നിങ്ങൾ എവിടുന്നു പഠിച്ചു?

നിങ്ങൾ നിപ വൈറസിനെ പ്രതിരോധിച്ചത് ലോകം കണ്ടതാണ്. നിങ്ങൾ സഹായത്തിനായി നിലവിളിക്കുന്നില്ല. എത്താത്ത സഹായത്തെ ഓർത്ത് പരസ്പരം പഴിചാരുന്നില്ല. നാട്യങ്ങളോ നാടകങ്ങളോ ഇല്ല.

ഇന്ത്യയിൽ മറ്റേതൊരു സ്റ്റേറ്റ് ആയിരുന്നുവെങ്കിലും ഈ അവസ്ഥയിൽ മൂന്നുമാസം പോയിട്ട് മൂന്നുദിവസം പോലും പിടിച്ചുനിൽക്കാൻ കഴിയുമായിരുന്നില്ല.

ഭൂപടത്തിൽ നിങ്ങൾ ഈ രാജ്യത്തിന്റ ഏറ്റവും താഴെ ആയിരിക്കാം. പക്ഷെ പ്രവർത്തി കൊണ്ടു നിങ്ങൾ വിദ്യാഭ്യാസത്തിലും ആരോഗ്യത്തിലും എന്നപോലെ ഇക്കാര്യത്തിലും ഇന്ത്യാ മഹാരാജ്യത്ത് എന്തിനേകാളും മുകളിലാണ്.

പ്രതികരിക്കുക പ്രതിരോധിക്കുക.. .ജീവിച്ചു കാണിക്കാനായി മരണം വരെ ഒരുമിച്ചു നിന്നു പോരാടുക എന്നത് നിങ്ങളുടെ രക്തത്തിലുള്ളതാണ്.

ഇന്ത്യ മുഴുവൻ കേരളത്തിന്റെ മനസ്ഥിതിയുള്ള മനുഷ്യർ ആയിരുന്നങ്കിൽ എന്ന് ആഗ്രഹിച്ചു പോകുന്നു.

ബിഗ് സല്യൂട്ട് കേരള. "

ഒരു തമിഴ് സുഹൃത്തിന്റെ വാക്കുകളുടെ മൊഴിമാറ്റം.

അതേ ലോകമേ.....
ഞങ്ങൾ മലയാളികൾ ഇങ്ങനെയാണ്...
ഞങ്ങൾ ഇതും അതിജീവിക്കും ഒറ്റക്കെട്ടായ്  (Y)

Credit : എഴുതിയ ആളെ കിട്ടിയിട്ടില്ല. കിട്ടിയാല്‍ ഉടനെ പേര് ചേര്‍ക്കുന്നതാണ്

ഹനാനും പിന്നെ സോഷ്യല്‍ മീഡിയയും

കുറച്ചു ദിവസമായി ഹനാന്‍ എന്ന കുട്ടിയാണ് നമ്മുടെ നാട്ടിലെ ചര്‍ച്ചാ  വിഷയം. പഠന ശേഷം മത്സ്യം വിറ്റ് കുടുംബം നോക്കുന്ന ഹനാന്‍ എന്ന പെണ്കുട്ടിയുടെ ജീവിത പോരാട്ട കഥ ഞാന്‍ മാത്ര്ഭുമി ഓണ്‍ലൈന്‍ പത്രത്തിലൂടെയാണ് വായിക്കുന്നത്. വായിച്ചപ്പോള്‍ ഒരുപാട് വിഷമം തോന്നുകയും ഒരു പോസറ്റിവ് എനര്‍ജി ഉണ്ടാവുകയും ചെയ്തു. പിന്നെ നോക്കുമ്പോള്‍ സോഷ്യല്‍ മീഡിയയും ഈ വാര്‍ത്ത ഏറ്റടുതിരിക്കുന്നു. ഫസ്ബൂകിലും വാട്സ് അപ്പിലും എല്ലാം ഏതു തന്നെ. മാത്രമല്ല ആ കുട്ടിക്ക് സഹായവുമായി പല പ്രമുഖരും വരുന്നതും കണ്ടു. എന്നാല്‍ നേരം ഒന്ന് ഇരുട്ടി വെളുക്കുമ്പോഴേക്കും കാര്യങ്ങള്‍ നേരെ തിരിച്ചായി. അതുവരെ പാടി പുകഴ്ത്തിയവര്‍ എല്ലാം അവള്‍ക്കെതിരായി. ഇതിനു കാരണവും ഈ സോഷ്യല്‍ മീഡിയ തന്നെ. ഒരുത്തന്‍ ഫേസ്ബുക്ക്‌ ലൈവ് വഴി , ഇതു വറും നാടകമാണെന്നും ഈ മീന്‍ വില്പനയും ജീവിത കഥ യും എല്ലാം ഒരു സിനിമ പ്രൊമോഷന്‍ ആണെന്നും പറഞ്ഞു. പിന്നെ കഴിഞ്ഞില്ലേ കഥ. കേട്ട പാതി കേള്‍ക്കാത്ത പാതി, ഒരുപണിയുമില്ലാതെ ഫസ്ബൂകില്‍ മാത്രം അഭിപ്രായം പറയുന്നവര്‍ അത് ഏറ്റടുത്തു. പിന്നെ വിമര്‍ശനവും ട്രോള്ളും കുത്തുവാക്കും നിറഞ്ഞു. നമ്മള്‍ മലയാളികള്‍ ഈ കാര്യത്തില്‍ ബഹു മിടുക്കന്‍മാര്‍ ആണല്ലോ. അത് നമ്മള്‍ പണ്ടും തെളിയിച്ചതാനും. പല മഹാന്മാരും നമ്മുടെ തെറിയഭിശേകം കാരണം ഫസിബൂക് അക്കൗണ്ട്‌ തന്നെ ക്ലോസ് ചെയ്തിട്ടുണ്ട്.

 ജോലിയും കൂലിയും ഇല്ലാതെ വെറുതെ ഇരുന്നു ലൈകും കമന്റും ഇട്ടു ജീവിക്കുന്ന വകകള്‍ക്കു ഹനാനെ വിമര്‍ശിക്കാന്‍ എന്ത് അധികാരം. ആരെങ്കിലും കഷ്ടപ്പെട്ട് ജീവിക്കുന്നതു കാണുമ്പോള്‍ അതില്‍ തെറ്റ് കണ്ടെത്താനും മതം നോക്കാനും ആരാണ് ഇവര്‍ക്ക് അധികാരം നല്‍കിയിരിക്കുന്നത്.

ഹനാന.... പഠനം മുന്നോട്ടു കൊണ്ടുപോകാനും കുടുംബം പുലര്‍ത്താനുമായി പഠനത്തോടൊപ്പം മീന്‍ വില്‍പ്പന വരെ നടത്തുന്ന ഒരു പത്തൊന്‍പതുകാരി. ബി.എസ്.സി കെമിസ്ട്രി വിദ്യാര്‍ത്ഥിനി. മണ്‍മറഞ്ഞ വീരനായകരുടെ ചരിത്ര കഥകളെക്കാള്‍ വരും തലമുറയ്ക്ക് എളുപ്പം മനസ്സിലാകുന്ന പെണ്‍ജീവിതം. ഏറെ ബഹുമാനത്തോടെ കാണേണ്ട ജീവിക്കുന്ന കഥാപാത്രം. ആദ്യഘട്ടത്തില്‍ അത് അങ്ങനെ തന്നെ ആയിരുന്നു. ലൈക്കുകളുടെയും പുകഴ്ത്തല്‍ കമന്റുകളുടെയും പ്രവാഹമായിരുന്നു. എന്നാല്‍, സമയം മുന്നോട്ടു പോയതോടെ കാര്യങ്ങള്‍ തകിടം മറിഞ്ഞു. അതാണ്‌ സോഷ്യല്‍ മീഡിയയുടെ കഴിവ്.

ആളുകള്‍ അവളുടെ ഫേസ്ബുക്ക്‌ പേജില്‍ പരതാന്‍ തുടങ്ങി. അവിടെ അവരെ വരവേറ്റത് കീറിയ ഉടുപ്പിട്ട് അലസയായി കണ്ണീരൊലിപ്പിച്ചുള്ള ഹനാന ആയിരുന്നില്ല. മറിച്ച്, ജീന്‍സും ടോപ്പുമിട്ട്, കൂളിങ് ഗ്ലാസും വെച്ച് സ്മാര്‍ട്ടായ ഹനാന ആയിരുന്നു. സിനിമ താരങ്ങളോടൊപ്പം ഫോട്ടോ. പിന്നെ അവളുടെ സംസാരം, വളരെ സ്മാര്‍ട്ടായി സംസാരിക്കുന്നു. വിരലില്‍ മോതിരം. ഇതൊക്കെ പോരെ നമുക്ക്. ഇതോടെ മലയാളി തനി സ്വഭാവം പുറത്തെടുത്തു. പബ്ലിസിറ്റിക്കു വേണ്ടി ആ പെണ്‍കുട്ടി കാട്ടിക്കൂട്ടിയ കോപ്രായങ്ങളായി അവളുടെ മീന്‍ വില്‍പ്പനയെ വ്യാഖ്യാനിച്ചു. പിന്നീടങ്ങോട്ട് അവളുടെ ഫേസ്ബുക്ക് പേജില്‍ നിറഞ്ഞത് അശ്ലീലവും അസഭ്യവും നിറഞ്ഞ കമന്റുകളായിരുന്നു. അവളെ മോശക്കാരിയാക്കി ചിരിപ്പിച്ച ട്രോളന്മാരും കുറവല്ല.

യാഥാത്ഥ്യം അറിയും മുന്‍പേ കയറെടുക്കുന്ന മലയാളി ഒരു പത്തൊന്‍പതുകാരി പെണ്‍കുട്ടി എന്ന പരിഗണന പോലും നല്‍കാതെ അവളെ തട്ടിപ്പുകാരിയാക്കി... മോശക്കാരിയാക്കി. അവളെ തഴുകാനും തല്ലാനും അവര്‍ തെരഞ്ഞെടുത്തത് കാലഘട്ടത്തിലെ ഏറ്റവും മൂര്‍ച്ചയേറിയ ആയുധമായ സോഷ്യല്‍ മീഡിയയെ തന്നെ.

സോഷ്യല്‍ മീഡിയുടെ അതിപ്രസരത്തിലൂടെ നെല്ലും പതിരും തിരിച്ചറിയാനുള്ള മലയാളിയുടെ ശേഷി അനുദിനം നഷ്ടപ്പെട്ടുകൊണ്ടിരിക്കുകയാണോ എന്ന് ചിന്തിച്ചുപോകുന്നു. അല്ലങ്കില്‍ മറ്റുള്ളവരുടെ വാക്കുകള്‍ കേട്ട് യാഥാര്‍ത്ഥ്യം മനസ്സിലാക്കാന്‍ ശ്രമിക്കാതെ അത് തന്നെ ശരി എന്ന രീതിയില്‍ അത് ഷയര്‍ ചെയ്യുന്നു. എത്ര വേകതയിലാണ് ലോകം മുഴുവന്‍ പരക്കുന്നത്. സത്യം മനസ്സിലാക്കാന്‍ ആരും ശ്രമിക്കുന്നില്ല ആര്‍ക്കും അതിനു സമയവുമില്ല. ഇവിടെ സ്വന്തം അഭിപ്രായം അല്ല പ്രകടിപ്പിക്കുന്നത്. മറ്റുള്ളവന്‍ എന്ത് പറഞ്ഞോ അത് തന്നെയാണ് എന്റെയും അഭിപ്രായം എന്ന രീതിയില്‍ പ്രജരിപ്പിക്കുന്നു. പുറമേ നിന്നു മാത്രം നോക്കി കുറ്റം പറയുന്നതിന് പകരം ആഴത്തില്‍ ഇറങ്ങിച്ചെന്ന് സ്വയം ഒന്നിരുത്തി ചിന്തിക്കാനോ നിജസ്ഥിതി അന്വേഷിക്കാനോ തിരക്കിന്റെ ഈ ലോകത്ത് ആരും മെനക്കെടുന്നില്ല. മറിച്ച്, എന്താണ് കാര്യമെന്നു പോലും അറിയില്ലെങ്കിലും പല പോസ്റ്റുകളും ഷെയര്‍ ചെയ്ത് പോകുകയാണ് ചെയ്യുന്നത്. 

സോഷ്യല്‍ മീഡിയ വഴി ഹര്‍ത്താല്‍ നടത്തിയ നാടാണ് ഈ കേരളം. എത്രയോ ജീവിച്ചിരിക്കുന്നവര്‍ക്ക് നമ്മള്‍ ആധാരന്ജലി അര്‍പിച്ചു. വിദ്യാസമ്പന്നരെന്ന് സ്വയം പുകഴ്ത്തുന്ന നമ്മള്‍ ഇനി എന്ന് ശരിയാകും... ആര് ശരിയാക്കും...? ഇങ്ങനെ തെറ്റായ കാര്യങ്ങള്‍ ചെയ്യുമ്പോള്‍ നമ്മള്‍ ഒന്നു ശ്രദ്ധിക്കക, ഇത് നമുക്കോ നമുക്ക് വേണ്ടപ്പെട്ടവര്‍ക്കോ ആയിന്നെങ്കിലെന്ന്. ഞാന്‍ അടക്കമുള്ളവരുടെ കാര്യമാണ് ഇത്.

ഹനാന്‍ വിഷയത്തില്‍ തെറ്റായ വാര്‍ത്ത‍ ആദ്യം പ്രജരിപ്പിച്ച ആളെ പോലീസ് അരസ്റ്റ് ചെയ്തു കഴിഞ്ഞു. വളരെ നല്ല കാര്യം. സൈബര്‍ നിയമങ്ങള്‍ കുടുതല്‍ ശക്തമാക്കുന്നതോടെ വ്യാജ വാര്‍ത്തകള്‍ പടച്ചു വിടുന്നതും കേട്ട പാതി കേള്‍ക്കാത്ത പാതി അത് ഷയര്‍ ചെയ്യതും കുറയും എന്ന് കരുതുന്നു.

അനുജത്തി ഹനാന്റെ ജീവിതത്തില്‍ അനുഭവിച്ച ബുദ്ധിമുട്ടുളും അതിനെ നേരിടുന്ന രീതിയും കൂടുതല്‍ അറിഞ്ഞപ്പോള്‍ ഒരുപാട് ബഹുമാനം തോനുന്നു. ഡോക്ടര്‍ ആകണം എന്ന ആഗ്രഹം സഫലമാകട്ടെ ..

നിങ്ങള്‍ പ്രജോതനമാണ് എല്ലാവര്ക്കും...

  

ജലം ഒരു മഹാത്ഭുതം - സൃഷ്ടാവിന്റെ അനുഗ്രഹം

വെള്ളം സൃഷ്ടിച്ച നാഥന്റെ മുന്നില്‍ ധ്യാനാത്മകമായി കഴിയേണ്ട സന്ദര്‍ഭമാണ് മഴ ധാരാളമായി ലഭിക്കുന്ന ഈ കാലം. രണ്ടു കണിക ഹൈഡ്രജനും ഒരു കണിക ഓക്‌സിജനും ചേര്‍ന്നുണ്ടാകുന്നത് എന്ന് ശാസ്ത്രം പറയുന്ന ജലം ഒരു മഹാത്ഭുതം തന്നെയാണ്. സൃഷ്ടികര്‍ത്താവിന്റെ സൃഷ്ടിവൈഭവം തെളിയിക്കാന്‍ മറ്റൊന്നും വേണ്ടതില്ല. ലോകത്ത് മനുഷ്യന് എന്തൊക്കെ വിഭവങ്ങള്‍ ലഭിക്കുന്നുണ്ടോ അതൊക്കെ അന്തിമവിശകലനത്തില്‍ ആകാശത്തുനിന്ന് വര്‍ഷിക്കപ്പെടുന്ന മഴയെ ആശ്രയിച്ചിരിക്കുന്നു. ഖുര്‍ആന്‍ പറയുന്നു: 'അവനാണ് നിങ്ങള്‍ക്ക് തന്റെ ദൃഷ്ടാന്തങ്ങള്‍ കാണിച്ചുതന്നത്. ആകാശത്തുനിന്ന് അവന്‍ നിങ്ങള്‍ക്ക് അന്നം ഇറക്കിത്തരുന്നു' (40:13).
'കാര്‍മുകിലില്‍നിന്ന് കുത്തിയൊഴുകും വെള്ളമിറക്കി. അതുവഴി ധാന്യവും ചെടികളും ഉല്‍പാദിപ്പിക്കാന്‍ ഇടതൂര്‍ന്ന തോട്ടങ്ങളും' (78:14-16).
ജപ്പാന്‍ ശാസ്ത്രജ്ഞനായ മസറു ഇമോട്ടോ15 വര്‍ഷങ്ങളെടുത്ത് 5 വാള്യങ്ങളിലായി തയാറാക്കിയ 'മെസേജ് ഫ്രം വാട്ടര്‍' എന്ന ഗ്രന്ഥത്തില്‍ അദ്ദേഹം കണ്ടെത്തിയ വെള്ളത്തിന്റെ മഹാത്ഭുതങ്ങളെക്കുറിച്ച് വിവരിക്കുന്നുണ്ട്. വെള്ളത്തിന് ചിന്തിക്കാനും വികാരങ്ങള്‍ പ്രകടിപ്പിക്കാനും കഴിവുണ്ടെന്നും ആകാശത്തുനിന്നും വീഴുന്ന ഓരോ മഞ്ഞുതുള്ളിയും വ്യത്യസ്തമാണെന്നും അദ്ദേഹം നിരീക്ഷിക്കുന്നു.
ജീവജാലങ്ങള്‍ക്ക് വാസയോഗ്യമാക്കി ഭൂമിയെ നിലനിര്‍ത്താനും ചൂട് ക്രമീകരിക്കാനും ഭൂമിയുടെ മുക്കാല്‍ ഭാഗവും വെള്ളമാക്കിയാണ് അല്ലാഹു സംവിധാനിച്ചത്. അതുകൊണ്ടാണ് ഭൂമിയെ നാം നീലഗോളം എന്ന് വിളിക്കുന്നത്. ജലചംക്രമണത്തെക്കുറിച്ച് പഠിക്കുന്നവര്‍ക്കറിയാം ഭൂമിയിലെ വെള്ളം നീരാവിയായി ആകാശത്തേക്കുയര്‍ത്തപ്പെടുന്ന പ്രക്രിയ. ഏത് മലിന ജലത്തെയും ശുദ്ധീകരിച്ച അവസ്ഥയിലാണ് ആകാശത്തേക്കുയര്‍ത്തുന്നത്. അല്ലെങ്കില്‍ മേഘമായി പെയ്തിറങ്ങുന്ന മഴ എത്ര മലിനമായിരിക്കും?
ജനനം മുതല്‍ മരണം വരെ മാത്രമല്ല മരണാനന്തര ജീവിതത്തിലും ജലത്തിന് മനുഷ്യ ജീവിതവുമായി അഭേദ്യമായ ബന്ധമുള്ളതായി വിശുദ്ധ ഖുര്‍ആന്‍ നമ്മെ ഉണര്‍ത്തുന്നു. ജീവന്റെ ഉറവിടം വെള്ളമാണെന്ന് അല്ലാഹു പ്രഖ്യാപിക്കുന്നു: 'ആകാശങ്ങളും ഭൂമിയും പരസ്പരം ഒട്ടിച്ചേര്‍ന്നവയായിരുന്നു. എന്നിട്ട് നാമവയെ വേര്‍പ്പെടുത്തി. വെള്ളത്തില്‍നിന്ന് ജീവനുള്ള എല്ലാ വസ്തുക്കളെയും സൃഷ്ടിച്ചു' (21:30). 'അല്ലാഹുവിന്റെ സിംഹാസനം വെള്ളത്തിനു മീതെയാണെന്നും നാം പഠിപ്പിക്കപ്പെട്ടു' (11:7).
സ്വര്‍ഗമാകട്ടെ താഴ്ഭാഗങ്ങളിലൂടെ അരുവികള്‍ ഒഴുകുന്ന തോട്ടങ്ങളാല്‍ അലംകൃതമാണ്. ഭൂമിയുടെ ഒത്ത നടുക്ക് മക്കാ മണലാരണ്യത്തില്‍ ഒരു ഉത്തമ സംസ്‌കൃതിക്ക് അല്ലാഹു തുടക്കം കുറിച്ചത് സംസം എന്ന ലോകം കണ്ട മഹാത്ഭുതമായ, ശാസ്ത്രലോകത്തെ ഞെട്ടിച്ചുകൊണ്ടിരിക്കുന്ന നീരുറവ നല്‍കിക്കൊണ്ടാണ്.

വിശ്വാസിയുടെ ജീവിതത്തില്‍ ജലത്തിന് അഭേദ്യമായ ബന്ധം
വൃത്തിയുടെ ആധാരമാണ് ജലം. വിശ്വാസത്തിന്റെ പാതിയാണ് വൃത്തി എന്നാണ് പ്രവാചകന്‍(സ) അനുചരന്മാരെ പഠിപ്പിച്ചത്. ദൈവവുമായുള്ള വിശ്വാസിയുടെ ബന്ധത്തിന് ഒഴിച്ചുകൂടാനാവാത്ത ഒന്നാണ് വെള്ളം. നാഥന്റെ മുന്നില്‍ നമസ്‌കാരമാകുന്ന അഭിമുഖ സംഭാഷണത്തിലേര്‍പ്പെടുമ്പോഴെല്ലാം അംഗശുദ്ധി നിര്‍ബന്ധമാണ്. ശരീരഭാഗങ്ങളിലൂടെ വുദൂ ചെയ്ത വെള്ളം ഇറ്റിവീഴുമ്പോള്‍ ആ ഭാഗത്തെ പാപങ്ങള്‍ പൊറുക്കപ്പെടുന്നു. അഞ്ചു നേരത്തെ നമസ്‌കാരത്തെ വീടിന് മുന്നിലൂടെ ഒഴുകുന്ന നദിയില്‍നിന്ന് അഞ്ചു തവണ കുളിക്കുന്നതിനോടാണ് ഉപമിച്ചത്. കുളി നിര്‍ബന്ധമാകുന്ന സന്ദര്‍ഭങ്ങളും വിശ്വാസിക്കുണ്ട്. ദാഹിക്കുന്ന മനുഷ്യര്‍ക്ക് മാത്രമല്ല, പക്ഷിമൃഗാദികള്‍ക്കും വൃക്ഷലതാദികള്‍ക്കും വെള്ളം നല്‍കുന്നത് പ്രതിഫലാര്‍ഹമായ ദാനമായിട്ടാണ് പഠിപ്പിക്കപ്പെട്ടിട്ടുള്ളത്. നായക്ക് വെള്ളം നല്‍കിയതിന്റെ പേരില്‍ സ്വര്‍ഗാവകാശിയായ മനുഷ്യന്റെ കഥ പ്രവാചകന്‍ വിവരിച്ചത് അതിനു വേണ്ടിയാണ്.

ഖുര്‍ആനിക നിര്‍ദേശങ്ങള്‍
ജലത്തിന് അറബി ഭാഷയില്‍ ഉപയോഗിക്കുന്ന 'മാഅ്' എന്ന പദം 63 തവണ ഖുര്‍ആനില്‍ വന്നിട്ടുണ്ട്. അല്ലാഹുവിന്റെ സൃഷ്ടിവൈഭവവും പ്രതാപവും വിളിച്ചോതാന്‍ പലയിടത്തും വെള്ളത്തിന്റെ സൃഷ്ടിപ്പ് എടുത്തു പറയുന്നു. 'നാം മാനത്തുനിന്ന് നിശ്ചിത തോതില്‍ വെള്ളം വീഴ്ത്തി. അതിനെ ഭൂമിയില്‍ തങ്ങിനില്‍ക്കുന്നതാക്കി. അതു വറ്റിച്ചുകളയാനും നമുക്കു കഴിയും. അങ്ങനെ ആ വെള്ളം വഴി നിങ്ങള്‍ക്ക് ഈത്തപ്പനകളുടെയും മുന്തിരിവള്ളിയുടെയും തോട്ടങ്ങള്‍ വളര്‍ത്തിത്തന്നു' (23: 18,19).
മഴയില്ലാത്ത അവസ്ഥ അല്ലാഹുവിന്റെ കോപത്തിന്റെയും ശിക്ഷയുടെയും ലക്ഷണമാണ്. അതിനാല്‍തന്നെ മഴക്കുവേണ്ടിയുള്ള പ്രാര്‍ഥന പശ്ചാത്താപത്തില്‍നിന്ന് തുടങ്ങണം. കാരണം അതിന്റെ കാരണക്കാരന്‍ മനുഷ്യനാണ്. 'മനുഷ്യകരങ്ങളുടെ പ്രവര്‍ത്തനഫലമായി കരയിലും കടലിലും കുഴപ്പം പ്രകടമായിരിക്കുന്നു. അവര്‍ ചെയ്തുകൂട്ടിയതില്‍ ചിലതിന്റെയെങ്കിലും ഫലം ഇവിടെ വെച്ചു തന്നെ ആസ്വദിപ്പിക്കാനാണത്. അവര്‍ ഒരുവേള നന്മയിലേക്കു മടങ്ങിയെങ്കിലോ?' (30:41).
എന്തൊരു ചൂട് എന്ന് വിലപിക്കുകയല്ല, അറിഞ്ഞും അറിയാതെയും ദൈവകോപത്തിനിരയാവുന്ന രീതിയിലുള്ള എല്ലാ ചെയ്തികള്‍ക്കും പൊറുക്കലിനെ തേടിക്കൊണ്ട് ദിവ്യകാരുണ്യത്തിന്റെ വാതിലില്‍ മുട്ടുന്നതാണ് കരണീയം.
ദുര്‍വ്യയം അരുത്
ഔഷധം പോലെ സൂക്ഷിച്ച് ശ്രദ്ധിച്ച് ആവശ്യത്തിന് മാത്രം വെള്ളം ഉപയോഗിക്കാനാണ് ഖുര്‍ആന്‍ പഠിപ്പിക്കുന്നത്. 'ആദം സന്തതികളേ, നിങ്ങള്‍ നിങ്ങളുടെ അലങ്കാരങ്ങളണിയുക. തിന്നുകയും കുടിക്കുകയും ചെയ്യുക. എന്നാല്‍ അമിതമാവരുത്' (7:31). ഒരു യാത്രക്കിടയില്‍ നദിക്കരയില്‍ ഇരുന്ന് വുദൂവെടുത്തുകൊണ്ടിരുന്ന സഅ്ദി(റ)ന്റെ അടുത്തേക്ക് എന്തോ ദുരന്തം സംഭവിച്ച മട്ടില്‍ പ്രവാചകന്‍(സ) ഓടിവന്നതും 'ഇതെന്തൊരു ധൂര്‍ത്താണ് സഅ്‌ദേ?' എന്ന് ചോദിച്ചതും 'വുദൂവിലും ധൂര്‍ത്തോ' എന്ന് ചോദിച്ച സഅ്ദിനോട് 'ഒഴുകുന്ന നദിയില്‍നിന്നാണെങ്കിലും ആവശ്യത്തിനേ ഉപയോഗിക്കാവൂ' എന്ന് നബി(സ) പറഞ്ഞതും ചരിത്രപ്രസിദ്ധമാണല്ലോ. ഇതിനേക്കാള്‍ മികച്ച സാമ്പത്തിക-പാരിസ്ഥിതിക അധ്യാപനം മറ്റെന്താണുള്ളത്?

ജലം പഠിപ്പിക്കുന്ന പാഠങ്ങള്‍
ജീവിതത്തിന് തുടക്കമുള്ളതുപോലെ തന്നെ ഒടുക്കവും ഉണ്ട്. ആകാശത്തുനിന്നും വര്‍ഷിക്കപ്പെടുന്ന മഴയില്‍ മുളച്ചുപൊന്തുന്ന സസ്യലതാദികള്‍ കൊടുംചൂടില്‍ ഇല്ലാതാവുന്നതുപോലെ നമ്മുടെ ജീവിതവും ഒരു സുപ്രഭാതത്തില്‍ ഏതെങ്കിലും രൂപത്തില്‍ ഒടുങ്ങും.
'ഐഹിക ജീവിതത്തിന്റെ ഉപമയിതാ: മാനത്തുനിന്നും നാം മഴപെയ്യിച്ചു. അതുവഴി ഭൂമിയില്‍ സസ്യങ്ങള്‍ ഇടകലര്‍ന്ന് വളര്‍ന്നു; മനുഷ്യര്‍ക്കും കന്നുകാലികള്‍ക്കും തിന്നാന്‍. അങ്ങനെ ഭൂമി അതിന്റെ ചമയങ്ങളണിയുകയും ചേതോഹരമാവുകയും ചെയ്തു. അവയൊക്കെ അനുഭവിക്കാന്‍ തങ്ങള്‍ കഴിവുറ്റവരായിരിക്കുന്നുവെന്ന് അതിന്റെ ഉടമകള്‍ കരുതി. അപ്പോള്‍ രാത്രിയോ പകലോ നമ്മുടെ കല്‍പന വന്നെത്തുന്നു. അങ്ങനെ നാമതിനെ നിശ്ശേഷം നശിപ്പിക്കുന്നു; ഇന്നലെ അവിടെ ഒന്നും തന്നെ ഉണ്ടായിരുന്നിട്ടില്ലാത്ത വിധം. ചിന്തിച്ചു മനസ്സിലാക്കുന്ന ജനതക്കുവേണ്ടിയാണ് നാം ഇവ്വിധം തെളിവുകള്‍ വിശദീകരിക്കുന്നത്' (10:24).
ജീവിതത്തിന് ഒടുക്കമുള്ളതുപോലെ ഉയിര്‍ത്തെഴുന്നേല്‍പും ഉണ്ട്: ഖുര്‍ആന്‍ സൂറത്തുന്നബഇല്‍ ഉയിര്‍ത്തെഴുന്നേല്‍പ് ഉറപ്പായും സംഭവിക്കും എന്ന് സ്ഥാപിച്ചുകൊണ്ട് പറയുന്ന ചില കാര്യങ്ങളുണ്ട്. അവയില്‍പെട്ടതാണ്, 'കാര്‍മുകിലില്‍നിന്ന് കുത്തിയൊഴുകും വെള്ളമിറക്കി. അതുവഴി ധാന്യവും ചെടികളും ഉല്‍പാദിപ്പിക്കാന്‍. ഇടതൂര്‍ന്ന തോട്ടങ്ങളും. നിശ്ചയമായും വിധിദിനം സമയനിര്‍ണിതമാണ്' (78:14-17).
വരണ്ടുണങ്ങിയ, ജീവന്റെ യാതൊരു അടയാളവും ഇല്ലാതിരുന്ന ഭൂമിയില്‍നിന്നും പുതുമഴക്ക് സസ്യലതാദികള്‍ മുളച്ചുപൊന്തുന്നതുപോലെ ആദിപിതാവ് മുതല്‍ മരിച്ച് മണ്ണോടു ചേര്‍ന്ന സകലമനുഷ്യരെയും പുനരുജ്ജീവിപ്പിക്കാനും രക്ഷാശിക്ഷകള്‍ നടപ്പിലാക്കാനും പ്രതിഫല ദിനത്തിനുടയവനായ അല്ലാഹുവിന് കഴിയുക തന്നെ ചെയ്യും. ജലചംക്രമണം പോലെ ജീവിതത്തില്‍നിന്ന് മരണവും മരണത്തില്‍നിന്ന് ജീവിതവും സംഭവിക്കുക തന്നെ ചെയ്യും. 'തന്റെ അനുഗ്രഹത്തിന്റെ മുന്നോടിയായി സുവാര്‍ത്ത അറിയിക്കുന്ന കാറ്റുകളയക്കുന്നതും അവന്‍ തന്നെ. അങ്ങനെ കാറ്റ് കനത്ത കാര്‍മേഘത്തെ വഹിച്ചുകഴിഞ്ഞാല്‍ നാം ആ കാറ്റിനെ ഉണര്‍വറ്റു കിടക്കുന്ന ഏതെങ്കിലും നാട്ടിലേക്ക് നയിക്കുന്നു. അതുവഴി നാം അവിടെ മഴ പെയ്യിക്കുന്നു. അതിലൂടെ എല്ലായിനം പഴങ്ങളും ഉല്‍പാദിപ്പിക്കുന്നു. അവ്വിധം നാം മരിച്ചവരെ ഉയിര്‍ത്തെഴുന്നേല്‍പിക്കും. നിങ്ങള്‍ കാര്യബോധമുള്ളവരായേക്കാം' (7:51).
ദിവ്യകാരുണ്യത്തെക്കുറിച്ച് നമ്മെ ഉണര്‍ത്തുകയും നാഥനോട് നന്ദിയുളളവരാവാന്‍ പഠിപ്പിക്കുകയും ചെയ്യുന്നു:
'നിങ്ങള്‍ കുടിക്കുന്ന വെള്ളത്തെ കുറിച്ച് ചിന്തിച്ചുവോ? നിങ്ങളാണോ കാര്‍മുകിലില്‍നിന്ന് വെള്ളമിറക്കിയത്? അതോ നാമോ അതിറക്കിയവന്‍. നാം ഉദ്ദേശിച്ചിരുന്നുവെങ്കില്‍ അതിനെ ഉപ്പുവെള്ളമാക്കി മാറ്റുമായിരുന്നു. എന്നിട്ടും നിങ്ങള്‍ നന്ദി കാണിക്കാത്തതെന്ത്?' (56:68-70).
നിര്‍മാണത്തിനും സംഹാരത്തിനും: ജീവന്‍ അങ്കുരിപ്പിക്കാനും നിലനിര്‍ത്താനും പ്രാപ്തിയുളള അതേ ജലം തന്നെ പലപ്പോഴും ജീവജാലങ്ങളുടെ നാശത്തിനും ഹേതുവാകാറുണ്ട്. സൂനാമി മുതല്‍ മഞ്ഞുമഴവരെ വിതച്ച നാശങ്ങള്‍ ഉദാഹരണമാണ്. അതുപോലെ ഈ പ്രപഞ്ചത്തെ സൃഷ്ടിച്ചു പരിപാലിക്കുന്ന സൃഷ്ടികര്‍ത്താവിന് ഇതെല്ലാം ഏതു നിമിഷവും നശിപ്പിക്കാനും സാധിക്കും.
നുരയും പതയും: ജലത്തില്‍നിന്ന് പൊന്തുന്ന നുരയും പതയും പെട്ടെന്ന് ശ്രദ്ധ പിടിച്ചുപറ്റുമെങ്കിലും അതിവേഗം നശിച്ചുപോകുന്നവയാണ്. അതുപോലെ മനുഷ്യര്‍ക്കിടയിലും നുരകളും പതകളും പൊന്തിവരാറുണ്ട്. എന്നാല്‍ അവയൊക്കെ എത്ര ആകര്‍ഷകങ്ങളാണെങ്കിലും ക്ഷണികങ്ങളാണ്. ശാശ്വത നന്മ ശുദ്ധജലം പോലെ തെളിഞ്ഞതും ശാന്തവുമായ മനുഷ്യന്റെ അടിസ്ഥാന നന്മകളായ ലാളിത്യം, വിനയം, സല്‍സ്വഭാവം, സത്യസന്ധത തുടങ്ങിയവയാണ്. കാട്ടിക്കൂട്ടലുകള്‍ക്കും ജാഡകള്‍ക്കും അല്‍പായുസ്സേ ഉള്ളൂ. ജലം നമ്മോടാവശ്യപ്പെടുന്നത് ശുദ്ധജലമാവാനാണ്, നുരയും പതയുമാവാതിരിക്കാനാണ്. കാരണം, തെളിഞ്ഞ വെള്ളമുള്ളിടത്തേക്ക് ആളുകള്‍ ഓടിയടുക്കും, അകന്നുപോവില്ല.
ഒഴുകുന്ന നദിയാവുക: സത്യവിശ്വാസിയുടെ ജീവിതം കെട്ടിക്കിടക്കുന്ന ജലംപോലെ ആകരുത്. കാരണം കെട്ടിക്കിടക്കുന്ന ജലം പെട്ടെന്ന് മലിനമായിത്തീരുന്നതുപോലെ നിഷ്‌ക്രിയരായി, പുതുതായി ഒന്നും പഠിക്കാതെ, പരീക്ഷിക്കാതെ ജീവിതം ചത്തതിനൊക്കുമേ ജീവിച്ചിരിക്കിലും എന്ന മട്ടില്‍ തള്ളിനീക്കുന്നവര്‍ പെട്ടെന്നു തന്നെ പലവിധ രോഗങ്ങള്‍ക്കും അടിമപ്പെട്ട് ഉള്ള കഴിവുകള്‍ പോലും നശിച്ച് കുടുംബത്തിനും സമൂഹത്തിനും ഒരു ഭാരവും ശല്യവുമായിത്തീരും. ശരീരം മാത്രമല്ല, മനസ്സും ദുഷിക്കും. അതിനാല്‍ ഉള്ള കഴിവുകള്‍ ഉപയോഗപ്പെടുത്തുകയും പുതിയ പുതിയ മേഖലകള്‍ കണ്ടെത്തുകയും പരിപോഷിപ്പിക്കുകയും ചെയ്യേണ്ടതുണ്ട്. കാലത്തിന്റെ ഒപ്പമല്ല കാലത്തിന് മുമ്പേ നടക്കാനാണ് ജലം മനുഷ്യനെ പഠിപ്പിക്കുന്നത്.
വൈരുധ്യങ്ങളുടെ വിസ്മയകരമായ സങ്കലനം: രണ്ട് വൈരുധ്യങ്ങള്‍ ചേര്‍ന്നാണ് ജലം എന്ന അത്ഭുതം ഉണ്ടാവുന്നത്. ഹൈഡ്രജനും ഓക്‌സിജനും. ഒന്ന് കത്തുന്നതും മറ്റൊന്ന് കത്താന്‍ സഹായിക്കുന്നതുമാണ്. ഇതുപോലെ വൈരുധ്യങ്ങളുടെ സമന്വയമാണ് മനുഷ്യജീവിതം. വ്യത്യസ്ത പ്രകൃതക്കാരായ ആണും പെണ്ണും ചേരുംപടി ചേരുമ്പോഴാണ് സ്വഛസുന്ദരമായൊഴുകുന്ന ഒരു കുടുംബം ഉടലെടുക്കുന്നത്. ഓരോന്നും അവയുടെ പ്രകൃതം നിലനിര്‍ത്തല്‍ ശരിയായ ഉല്‍പന്നം തന്നെ ലഭിക്കാന്‍ അനിവാര്യമാണ്. ഒന്ന് മറ്റൊന്നിനെ പോലെയാവാന്‍ ശ്രമിക്കുമ്പോള്‍ അവിടെ സംഘര്‍ഷം ഉടലെടുക്കുന്നു. ഇത് ജലത്തില്‍നിന്നും മനുഷ്യന്‍ പഠിക്കേണ്ട സൂക്ഷ്മമായ പാഠമാണ്. രണ്ട് ഹൈഡ്രജന്‍ കണികകള്‍ക്ക് പകരം ഒന്നോ മൂന്നോ ആയാല്‍, ഓക്‌സിജന്‍ ഒരു കണികക്ക് പകരം രണ്ടോ മൂന്നോ ആയാല്‍ ഈ സമന്വയത്തിലൂടെയുള്ള അത്ഭുതം സംഭവിക്കില്ല.
ബഹുമുഖത: ജലത്തിന് സ്വന്തമായി രൂപമോ ഗന്ധമോ ഇല്ല. പാത്രത്തിനനുസരിച്ച് രൂപമാറ്റം വരുത്താനും കൂടിച്ചേരുന്ന വസ്തുവിനനുസരിച്ച് രുചിയും ഗന്ധവും മാറ്റാനും കഴിയുന്നു. നല്ല വസ്തുക്കളുമായി കൂടുമ്പോള്‍ നല്ല സുഗന്ധവും രുചിയും. ചീത്ത വസ്തുക്കളുമായാണ് കൂടിക്കലരുന്നതെങ്കില്‍ നേരെ മറിച്ചും. ഇത് രണ്ടും മനുഷ്യന് പാഠമാണ്. ഏതു സാഹചര്യത്തിലും അവസ്ഥയിലും ഇണങ്ങിച്ചേര്‍ന്ന് ജീവിക്കാനും ഏതു തരം സഹജീവികള്‍ക്കും പ്രയോജനകരമാവാനും മനുഷ്യന് സാധിക്കണം. എന്നാല്‍ അലിഞ്ഞുചേരേണ്ടത് നല്ല ആളുകളുമായാണ്. ഇല്ലെങ്കില്‍ നമ്മുടെ സ്വഭാവത്തിലും ദോഷകരമായ മാറ്റങ്ങള്‍ ഉണ്ടാവും. അരൂപിയാണ് ജലം. എന്നാല്‍ നിര്‍വഹണത്തിനും സംഹാരത്തിനും കഴിവുള്ളത്. അല്ലാഹുവും അങ്ങനെ തന്നെ. ശക്തിയുടെ പ്രഭാവം നിര്‍ണയിക്കപ്പെടേണ്ടത് രൂപം, ഭാവം, ഗന്ധം ആദിയായവയെ അടിസ്ഥാനപ്പെടുത്തിയല്ല. രൂപമില്ലാതെ തന്നെ റബ്ബിനെ അറിയാനും പ്രാപിക്കാനും അനുഭവിക്കാനും കഴിയും.
സ്വയം ശുദ്ധിയുള്ളവരാവുക: സ്വയം ശുദ്ധിയുള്ള വെള്ളത്തിനേ മറ്റുള്ളവരെ ശുദ്ധിയാക്കാന്‍ കഴിയൂ. അതുപോലെ നാം സ്വയം ശുദ്ധിയുള്ളവരായാലേ സമൂഹത്തെ സംസ്‌കരിച്ചെടുക്കുക എന്ന ഉത്തമ മുസ്‌ലിമിന്റെ ഉത്തരവാദിത്തം ശരിയാംവണ്ണം നിര്‍വഹിക്കാന്‍ കഴിയൂ.
ഫലങ്ങള്‍ വ്യത്യസ്തം: ആകാശത്തുനിന്നും ഒരേപോലെ വര്‍ഷിക്കപ്പെട്ട മഴ ഭൂമിയുടെ വിവിധ പ്രദേശങ്ങളില്‍ പതിക്കുമ്പോള്‍ ഉണ്ടാവുന്ന ഫലം വ്യത്യസ്തം. ചിലയിടങ്ങളില്‍ നല്ല ഫലം തരുന്ന സസ്യലതാദികള്‍ മുളച്ചുപൊന്തുമ്പോള്‍ വേറെ ചിലയിടങ്ങളില്‍ അതേ വെള്ളം കെട്ടിനിന്ന് കൊതുകുകളും മറ്റും മുട്ടയിട്ട് പെരുകി ദുര്‍ഗന്ധം വമിക്കുന്ന ശല്യമായി മാറുന്നു. മറ്റു സ്ഥലങ്ങളിലാവട്ടെ വെറുതെ ഒഴുകിപ്പോകുന്നു. ഇതുപോലെയാണ് ദിവ്യബോധനം മനുഷ്യരില്‍ പ്രവര്‍ത്തിക്കുന്നത്. ചിലര്‍ അതില്‍നിന്ന് പാഠമുള്‍ക്കൊണ്ട് സ്വയം തന്നെ നല്ല ഫലം നല്‍കുന്ന ഒരു വന്‍ വൃക്ഷത്തെപ്പോലെയാകുന്നു. വേറെ ചിലരാവട്ടെ നിഷേധികളായി മാറുന്നു. നല്ല കൃഷിക്ക് പാകപ്പെടുത്തി നല്ല മണ്ണ് അനിവാര്യമായതുപോലെ പാകപ്പെട്ട മനസ്സില്‍ ദിവ്യവചനങ്ങള്‍ പെയ്തിറങ്ങുമ്പോള്‍ സല്‍ഫലങ്ങള്‍ ഉണ്ടാവുന്നു.

ചില പ്രായോഗിക നിര്‍ദേശങ്ങള്‍
1. Reduce, Reuse, Recycle എന്ന പാരിസ്ഥിതിക തത്വം വെള്ളത്തിന്റെ കാര്യത്തില്‍ പാലിക്കുകയാണെങ്കില്‍ വേനലില്‍ നാമനുഭവിക്കുന്ന വരള്‍ച്ച നിയന്ത്രിക്കാന്‍ കഴിയും. പാത്രം കഴുകുന്ന വെള്ളം, തുണി അലക്കുന്ന വെള്ളം, തുടക്കുന്ന വെള്ളം, വാഹനം കഴുകുന്ന വെള്ളം തുടങ്ങിയവ സൂക്ഷിച്ച് ശേഖരിച്ചാല്‍ മറ്റാവശ്യങ്ങള്‍ക്ക് ഉപയോഗിക്കാം.
2. മഴക്കുഴികള്‍ ഉണ്ടാക്കല്‍, കിണര്‍ റീചാര്‍ജിംഗ്, ഇറവെള്ളം ശേഖരിക്കല്‍, തെങ്ങ് പോലുള്ള വൃക്ഷങ്ങള്‍ക്ക് തടമെടുക്കല്‍ തുടങ്ങിയവയിലൂടെ പെയ്തിറങ്ങുന്ന മഴവെള്ളം പരമാവധി ഭൂമിയില്‍ ശേഖരിക്കുക.
3. കൃഷി ആരാധനയാണെന്ന് മനസ്സിലാക്കി സാധ്യമാകുന്ന കാര്‍ഷിക വൃത്തികളില്‍ ഏര്‍പ്പെടുക. ചെടികളും മരങ്ങളും പരമാവധി വെച്ചുപിടിപ്പിക്കുക. മൊത്തം അന്തരീക്ഷത്തില്‍ മാറ്റമുണ്ടാകുമ്പോള്‍ കൂടുതല്‍ മഴ ലഭ്യമാകും. ലോകാവസാനം ഉറപ്പായിട്ടും കൈയിലുള്ള വൃക്ഷത്തൈ നടാന്‍ പ്രവാചകന്‍ പഠിപ്പിച്ചത് അതിനാണ്.
4. വീട്ടില്‍ ഒരു ജലനയം ഉണ്ടാക്കുകയും അത് എല്ലാ അംഗങ്ങളെയും ബോധ്യപ്പെടുത്തുകയും നടപ്പിലാക്കുന്നുണ്ട് എന്ന് ഉറപ്പുവരുത്തുകയും ചെയ്യുക. വെള്ളം ഉള്ളപ്പോഴും ഇല്ലാത്തപ്പോഴും വേനലിലും വര്‍ഷകാലത്തും അതൊരു ശീലമാക്കി മാറ്റണം. ജലദിനം, പരിസ്ഥിതി ദിനം തുടങ്ങിയ ആഘോഷങ്ങളില്‍ പരിമിതപ്പെടുന്നതല്ല, എന്നും നിലനില്‍ക്കുന്ന ജീവിത പരിശീലനങ്ങളാണ് നാമും നമ്മുടെ കുട്ടികളും സ്വായത്തമാക്കേണ്ടത്.

 (പകര്‍ത്തി എഴുതിയത് )